The Mizoram Water Resources (Management and Regulation) Bill, 2024 chu vawiin khan Assembly thutkhawmah member ten lungrual takin an pass. Bill neitu Irrigation and Water Resources Department changtu Minister PC Vanlalruata chuan mihring lo pung zelah Mizorama tuihna neih te mumal taka enkawl a pawimawh a ti a, Khawvel thang zelah tui neih enkawlna felfai tak a awmloh chuan nakinah harsatna awm palh thei a ni tih sawiin bill chu department tin tan thil pawimawh ani a ti a, a enkawlna tur Council sang berah Chief Minister Chairman na hnuai ani dawn tih sawiin khawtlang hmasawn zel nan bill tangkai tak anih a beisei tih a sawi. Sawihona ah hian member 8 in sawiin House Leader Pu Lalduhoma chuan Sawrkar hmasa tih ni mahse thil tha anih phawt chuan chhawm zel chu ram tan a tha zawk a ti a, Bill an sawiho mekah a hmala tu chu sawrkar kalta MNF Sawrkar ani tih sawiin Bill tha tak mi tin tana pawimawh ani tih a sawi.
Chief Minister chuan House a passed Bill chhawp chhuah kawngah Department ten zirchian a pawimawh tih sawiin dan anga hman anih dawn chuan dik famkimlo siam that ngai tam tak awm thin chu department in en fiah nan hmang se a duh tih a sawi bawk. Opposition Leader Pu Lalchhandama Ralte chuan Bill chu Mizoram kal zel tura thil pawimawh ani a ti a, Khawvel sik leh sa inthlak avanga tui hna kang chat hmun tam taka awm te chu thangthar lo awm zel tur tan a pawi dawn tih sawiin mahni duhthua leihnuaia tuihna awm verh te pawh dan hnuaiah vek ani thei tur chu tha atih thu sawiin sawrkarin a hlawkna an tel ve theih na turin awmze nei zawka kal a pawimawh a ti a, Bill tha tak niin passed ni mahse a hman dan a pawimawh zawk tih sawiin dan tha an passed chu mipuiten an hriat theihna turin zirtir a pawimawh a ti a, thangthar lokal zel tur ten an hman tangkai theihna turin Bill chu a thlawp thu a sawi.
Pu Lalchhandama Ralte chuan sawrkar hmasa ah Bill chu an siam dawnah mithiam hrang hrang te rawn niin sawrkara department dang a kaihhnawih te pawh rawn an ni a ti a, sawrkar hmasa ah April thla velah peih fel tum mahse kawng thui tak kal ngai anih vangin September ni 27 Cabinet meeting ah an passed thei chauh a ti a, session koh leh a rem tawhloh avangin an passed ta lo tih a sawi bawk.
