ZPM MP Candidate tur hi vawiina an party chhung inkhawmah Party President Pu Lalliansawta chuan puangin kumina Lok Sabha inthlan lo awm turah an party candidate chu Pu Richard Lalhmangaiha (Richie-a) tia koh chu ani dawn a ti a, Venghlui a cheng niin Wg. Commander Pu Lalzawma fapa ani tih a sawi. Pu Richard Lalhmangaiha hi MAMCO ah Asst Manager niin kum 2015 khan Early Retirement in a chhuak a, contract hna hrang hrangah thiante nen in thurualin an thawk thin a, zirna lamah B.Com a ni.
Pu Richard Lalhmangaiha chuan a hmathlir zingah thingtlang lo neih tih rehna atan permanent farming siam leh lo neitute thlai thar hralh chhuahna tur market mumal tak siam nana pawimawh thingtlang lama warehouse leh kudam changtlung taka siam te leh Mizoram chhunga thlai thar te value addition atan processing leh a tul anga hmalak bakah Mizoram buhfai thar te felfai taka pack anih theih nan rice mill siam leh Mizorama thalaite eizawnna lama hma an sawn theihna tur te leh District tina JNV School din chu central policy anih angin district thara hmalakna kalpui bakah Mizoram artui leh arsa lama intodelh tura theihtawp chhuah tura hmalak a tum bawk.
Rorel lai ZPM tih loh party dang ten kumin Lok Sabha inthlana an candidate tur an puan hun hriat ala ni lo a, MNF, Congress leh BJP ten candidate a hran in an nei dawn nia hriat a ni. Zoram People’s Movement hian vawiin vek khan an Thalai President atan South Tuipui bialtu MLA Pu Jeje Lalpekhlua an ruat thu an puang aa, ZPM Party President Pu Lalliansawta’n an party dan bu in thuneihna a pek hmangin ZPM Thalai President tur hi a ruat thar a ni. ZPM President hian Thalai Vice President atan hian mi pahnih Laltanpuia Zote, Bethlehem Vengthlang leh Zoramchhana Sailo, Chanmari bakah Treasurer atan R. Lalmalsawma, Hunthar a ruat bawk a ni.
