Lai Autonomous District Council (LADC) a Chief Executive Member (CEM) Pu C. Lalmuanthanga’n February 12 a banna a thehluh hnu-ah, ZPM chuan LADC-a sorkar din turin hma an la chho mek. Mipui thlan Member 25 awmna LADC-ah Congress MDC pakhat leh MNF MDC 13 te’n United Legislature Party dina nikum May 7 atanga sorkarna an siam chu, BJP MDC awm chhun Pu T. Zakunga’n ZPM a zawm bakah ULP a tel Member pahnih Pu V. Zirsanga leh Pu Lallawmsanga Apetow ten ZPM Legislature Party zawm a, MNF Party atanga an chhuahsan vangin, CEM chu thlawptu a neih dan buk tura tih a ni a. Hetih lai hian CEM Pu C. Lalmuanthanga’n larsap hnena banna a thehluh leh tak vangin LADC Sorkar dinglai a tlu ta a ni.
Member 13 thlawptu nei ZPM Legislature Party chuan Pu V. Zirsanga chu an hruaitu-ah thlangin a kaihhruaina a sorkar a din a nih theih na’n hmalakna an kalpui mek a. Sorkarna an siam theih thu hi District Council & Minority Affairs Department kaltlangin larsap hnehah an thehlut tawh a.
Mahse, larsap Gen. V K Singh hi a zin avangin thutlukna siam a la ni lova, larsap hi nimin tlai khan a lo haw iin Raj Bhavan atanga thu dawn chuan a sawi. Larsapin CEM atana ZPM hruaitu Pu V. Zirsanga a pawm chuan CEM atan lakluh a ni anga, LADC ah Sorkar thar a piang dawn a ni.
