Rorel lai Zoram People’s Movement (ZPM) party chuan thla thar April ni 1 atangin Lok Sabha inthlan lo awm tur atana campaign beihpui an thlak dawn. ZPM chuan nimin khan thuchhuah siamin Campaign Kickoff hi Aizawl Vanapa Hall ah hman a ni dawn a, party hruaitute sawi danin Chief Minister Pu Lalduhoma chuan he hunah hian thu a sawi anga, amah bakah hian Party hruaitu dangte leh President Pu Lalliansawta te he hunah hian an tel bawk ang. Lok Sabha inthlan hi Mizoram ah April ni 19-a neih tur a ni a, state pumpuiah vote nei mi nuai 8 sing 61,277 an awm a, hmeiche voter nuai 4 sing 41,520 an awm a, mipa voter nuai 4 sing 14,777 an awm bawk a ni.
Indian National Congress pawhin March ni 28 atangin Campaign beihpui an thlak tan dawn a, hetihlai hian state-a eptu party lain ber Mizo National Front (MNF) leh BJP hruaitute chuan campaign bul an tan tawh tih an sawi a ni. April ni 19-a Mizoram Lok Sabha bial inthlan vote thlak turah candidate 6-in an chuh dawn tih a chiang tawh a, mi 5 hi political party in an dintir an ni a, 1 chu independent a ni.
Hun hmasa thlirin Mizorama Lok Sabha inthlanah hian Congress party chu vawi 6 a chak tawh a, MNF vawi 2 chak tawhin kum 2017-a din ZPM chuan a vawi khatna atan party malin Lok Sabha ah an ding dawn a, ZPM hi kum 2019 khan Congress nen common candidate anlo nei tawh a ni. Kum 2019 Lok Sabha inthlanah khan MNF party chuan vote awm zawng zawng atangin zaa 44.89 a hmu a, ZPM leh Congress tangdunin dawtin zaa 43.26 an hmu a, BJP in zaa 5.75 percent hmu in People’s Representation for Identity and Status of Mizoram (PRISM) chuan zaa 2.67 per cent an hmu a, 2.94 per cent chu independent candidate pahnih ten an hmu bawk a ni.
Tun tum Lok Sabha Mizoram bial inthlanna tur atan hian Election Commission chuan March ni 20 khan hriattirna a tichhuak a. Khami ni atang khan nomination thehluh tan theih a ni a. Chuh tumte hming pekluh theih hun hi Nilaini khian a tawp ang a, a tuk Ningani-ah nomination lehkhate endik a ni ang. March ni 30 khi hming pelutte’n an nomination an hnuhdawh theihna ni hnuhnung ber a ni dawn a. April ni 19-ah vote thlakin June ni 4-ah vote tlate chhiar a ni dawn a ni.
