Chakma Autonomous District Council (CADC)-a MDC ngah ber ni ta ZPM MDC 10-te chuan CADC-a sorkarna siam thei an nih thu hriattir turin naktuk hian larsap Dr.Hari Babu Kambhampati hmuh an tum.
ZPM General Headquarters President Pu Lalliansawta chuan nimin khan ZPM pisa-ah an party zawm thar CADC MDC 5-te lawmluhna hun an hmang tih swiin,heti hian CADC-ah ZPM Party chuan MDC 5 a neih sa tawhte leh tuna MNF MDC 5, ZPM zawm tharte nen MDC 10 a nei ta a, CADC-ah MDC ngah ber party a ni ta a ni, a ti a. Kalphung thar, mipui sorkar chuan autonomous ditrict council-a party dang sorkar lai thiah tumin sorkar chakna nen hmalakna a nei ngai lo niin a sawi a. Chutih laiin anmahni duhthu ngei a ZPM rawn zawmte erawh chu ZPM Party chuan lawm takin a lo pawm thung a ni a ti.
CADC-ah hian MDC 20 awmin MNF MDC 5 in anmahni duhthu ngeia ZPM Party an zawm tak avangin ZPM Party chuan MDC 10 a nei ta tih sawiin, BJP in MDC 9 an nei a, MNF in MDC 1 an nei ta a ni a ti a. Tunah hian ZPM Party chu CADC-ah MDC ngah ber party a lo nih tak avangin CADC-ah sorkarna siam tumin MDC 10 te chuan Thawhtanni-ah larsap hmuh an tum a ni, a ti.
He hunah hian Local Administration, District Council & Minority Affairs changtu minister Pu Lalsawivunga pawhin thu sawiin, CADC –a MDC 5 in an mahni duhthlanna ngeia ZPM Party an rawn zawm chu lawmawm a tih thu leh, Mizoram tan mai bakah CADC mipuite tan hmasawnna tluantling thlentu ni turin duhsakna a hlan ani. MDC 5 te lawmluhna ah hian ZPM General headquarters hruaitute bakah MLA thenkhatte an tel bawk a ni.
