Lok Sabha inthlanpui lo awm tur atan Zoram People’s Movement chuan vawiin khan campaign bul an ṭan a, ZPM Leader leh Chief Minister Pu Lalduhoma chuan hnam leh sakhaw tana him chin zelah sawrkar laipui ṭha taka thawhpui an tum tih a sawi.
ZPM Party in Vanapa Hall-a Lok Sabha election campaign kickoff an buatsaih chu ZPM President Pu Lalliansawta chuan a khuhhawng a, he hun hmanpuitu Chief Minister Pu Lalduhoma chuan Mizoram Legislative Assembly-a MLA nei party zingah ZPM chiah chu Central-a ṭan lam neilo anni tih a sawi a, hetihlai hian Central chu sum leh pai mamawh pe tu ber annih avangin biak chhiat an tumloh thu sawiin hnam leh sakhua tan a him chin zelah thawhpuiin ṭhat leh ṭhata inlawm tawn an tum a ti.
ZPM MP Candidate Pu Richard Vanlalhmangaiha pawhin thu sawiin ZPM Party chu zoram mipuiten enchhin an tum lova, en tak tak an tum ani a ti a, sawrkar laipui leh state sawrkar pahnih inkara thawk tur anih angin leihlawn nghet tak nih a tum a ti a, state budget ah hmasawnna hnathawhna tur a tlem avangin project leh scheme a tam thei ang ber sawrkar laipui atangin hai chhuah a tum tur thu a sawi a, zo hnahthlak zawng zawng MP nih a tum thu leh an harsatna leh manganna an thlen theihna turin an tan a inhawng reng dawn tih a sawi bawk.
