Pu Lalliansawta hian vote 2,528 hmuin President chuhtu dang Pu VL Zaithanzama chuan vote 1,963 a hmu a ni. Nimin khan ZPM hian General Assembly Vawi – 1 na Aizawl-ah an nei a, hruaitu thar thlangin, Vice President ah Pu W Chhuanawma thlan a ni a, he post hi mi 3 in an chuh a, Party treasurer ni lai Pu C. Laltanpuia leh Pu C Lianlunga te a hneh a ni. Treasurer ah Pu C Lalchhuanthangan vote 1489 hmuin thlan tlin a ni a, he post hi mi 5 in an chuh a ni.
ZPM hruaitu thlanna hi Mizoram College Teachers Association (MCTA) in a kaihruai a, Mizoram hmun hrang hrang atangin palai 4,000 chuang an pungkhawm a, Unit khat in vote ruk (6) zel an neih bakah Block tin OB zawngin vote an neih ve bawk a ni. ZPM inthlanah hian ZPM Working President, Home Minister ni ta Pu K Sapdangan leh Vice President Kenneth Chawngliana, State Planning Board Vice Chairman atana dah thar ten an chuh lo a ni.
Chief Minister Pu Lalduhoma leh ZPM minister dang te zingah Party a nihna chelh lo an awm nual a, Pu Lalduhoma hian ZPM Leader tia vuah thin a ni a, Party nihna a chelh lo a ni. He inthlanah hian Chief Minister Pu Lalduhoma chuan thu sawiin, an inthlanah chuhtu an awm nual chu, thil kalphung pangngai anih bakah anni tan chuan hmasawnna nasa tak a ni a ti a. Hruaitu thlan chhuah te chu an pawl hruai tura Pathian hriak thihah an pawm tur a ni a ti.
