Central YMA chuan vawiin khan Myanmar buai avanga Zohnahthlak raltlan Manipur Jail-a hren mekte chu Mizorama lak chhawn theih dan kawng dap turin Home Minister Pu K. Sapdanga an ngen. Central YMA hruaitute hi an President Pu Lalhmachhuana hovin Home Minister pisaah an leng a. Tunhnaia Sub-Hqrs. YMA, Champhai huam chhunga Myanmar Raltlante khawsakna In chu, Sawrkar lamin an hman a tul dawn tak avangin, Relief Camp thar sakna tur DM&R Deptt. a senso tur sum an dilna lehkha DM&R Minister hnenah an thehlut a.
Minister chuan thil ṭul tak a nih thu leh ṭha a tih thu a lo hrilh a, a rang thei ang bera hmalak dan tur rel turin Committee koh a nih tur thu a lo hrilh a. Myanmar buai avanga Zohnahthlak raltlan, mi eng emaw zat, Manipur Jail-a hren mek te, Mizoram lama lak chhawn theih dan kawng dap tura Central YMA ngenna pawh police lam hotute nen hmalak dan tur an lo sawiho tur thuin a lo chhang a ni.
Central YMA hruaitute hian Village Profile Apps. Lailen Consulting Pvt. Ltd. an siam tir chungchang Home Minister hi an sawipui bawk a. Home Minister hian senso ngai belh tur a awm a nih pawhin, a rang thei ang bera hman theih a peih ni se a lo ti a. Tunhnaia Zirlai Pawl pakhat hruaitu man an awm chungchangah dan chunga leng tumah an awm loh thu leh, hetihruala he thil thleng avanga Mizoram Zirlai pawl leh hruaitute inkarah te, Sawrkar lam nen a inkarahte pawh boruak ṭhalo awmlo tura ram leh hnam ngaihtuahna fim tak nena kalpui a ṭul an tih thute an sawi a ni.
