Mizoram thenawm Myanmar ram Chin state a sipai sorkar dotu ‘Zofa’ pawl hrang hrang zinga inrem lohna awm thin chinfel tumin nimin khan pawl hrang palite chu ZoRO uapna hnuai-ah inbia-in inremna an ziak. Chinland Government leh Chin National Front (CNF) tangrual mekte leh Interim Chin National Consultative Council (ICNCC) leh Chin Brotherhood aiawhte hi Adviser to chief minister, ZoRO vice president ni bawk Pu Lalmuanpuia Punte pisa-ah an inbia a. He inbiakna-ah hian inremna thuthlung an siam in Zofate (Chin-Kuki-Mizo) chu thlahtu thuhmun, tawng khat hmang (Same language – different dialect), nunphung thuhmun, serh leh sang inkhawih pawlh, beiseina thuhmun vuana dam leh tlang khatah, thih leh ruam khatah ti thin unau an ni tih an pawm a. Ram leh hnam tana hma an lakna kawngah an thahnemngaih luat avanga unau an inhmu thiam lo chu pawi an tih thu leh, tun hnuah thleng tawh lo se an duh thu an tarlang a. Tun hnuah buaina leh harsatna a lo awm pawhin tharum leh ralthuam che lek zawng a hmalak loh ni se, an ti a , ZoRO hmalakna a inremna thuthlung sawiho chu tha an tih thu leh an pawm a thu sawiin inremna tluantling a awm theih na’n aatul dan a zira inbiakna neih leh nise an ti a, meeting leh hunah inremna committee din nise tih an thuthlungah chuan an tarlang bawk a ni.
He inremna thuthlungah hian Chinland sorkar aiawhin Chin state chief minister Pu Pa Thang leh CNF aiawhin an pawl vice chairman-1 Pu Thang Ning Kee ten an hming an ziak a. ICNCC aiawhin Chin state chief minister hlui Salai Lian Luai leh Chin Brotherhood aiawhin Pu Paw Sila te chuan an hming an ziah ZoRO aiawhin an president Pu R. Sangkawia leh general secretary Pu L. Ramdinliana Renthlei te’n an hming an ziak hnan ve bawk a ni. Pu Lalmuanpuia Punte chuan inremna lam hawi a ke pen a, remna palai an rawn kal tha chu lawmawm a tih thu a sawi a. Cin state a Zofa unaute inrem chu Mizoram sorkar duhdan a ni a, Aizawla an inkawmkhawmna pawh sorkarin a hriatpui a ni, a ti a. Sorkarin ZoRO kaltlangin remna palai hna an thawk tih sawiin, India Sorkar pawh hian pawl hrangte inrem hi a duh a, tanpuina pek pawh a duh a ni.” a ti.
Pu L. Ramdinliana Renthlei chuan ZoRO in remna palai hna an thawh chhan sawiin, Zofate chu unau vek an ni a, inhmu thiam lo tur an ni lo a, tangrual tur zawk an ni, a ti a. Unau an nih angin inthen thei an ni lo a, indo thei pawh an ni lova, Zofate chu khawi hmunah pawh awm se la lungrual taka awm tur an ni a ti a, Mahni hnampuite hmelmaah an insiam tur a ni lo a, hmelma thuhmun nei tlang zawk tur an ni, a ti. Zofate chu Pathian ringtu, an nih angin, engtik ni-ah emaw chuan inremin an la awm anga an la insuihkhawm vek dawn a ni.” a ti a ni.
