Chief Minister Pu Lalduhoma’n zirna ah Mizoram a fail tih chu pawm ngam a ngai a ti a, a siam that nan sawrkar leh mipui thawhhona Public-Private Partnership ngaih pawimawh ani dawn a ti. He thu hi vawiina Assembly thutkhawma Minister demand sawihona ah sawiin Pu Lalduhoma chuan sawrkar tharin a ngaih pawimawh chu PPP mode ani dawn a ti a, hetah hian private school leh kohhran school te nen thawk ho in sawrkar in a tanpui dawn a, zirna fee pawh tihhniam tir tum an ni dawn tih a sawi.
Pu Lalduhoma chuan Mizoram hmun hrang hrangah sawrkar sikul zirtirtu sakna tur cheng vbch 31 nuaih 50 dah ani a ti a, quarter sakna ah Principal emaw Head of Institution in hming a ziah loh chuan bill pek ani dawn lo a ti a, theihtawpa tang tlangin tha thei ang berin hmalak ani dawn tih a sawi. Chief Minister chuan Library leh Computer a thlawna khaw 237 pekna tur Finance Ministry cheng vbch 55 an pe a ti a, first instalment vbch 27 vel an dawng tawh tih a sawi.
Pu Lalduhoma chuan 3 language formula chu an ngai pawimawh dawn tih sawiin English, Hindi leh Mizo tawng chu an ngai pawimawh dawn a ti a, tun hma in zirna ah kohhran thuk takin a inrawlh thin tih sawiin hun a rei hnuah Kohhran inhnuk dawkin Sawrkar a inrawlh thuk tual tual a, sawrkar sikul alo tam a, hlawh sang zawk leh qualification tha zawk ruaiin zirna erawh a chhe tual tual a ti a, English medium a zirtirtu hlawh tlem zawk te zirna pek theih ang chu hlawh tam zawkin an pe thei tawhlo a, kum tam tak school khar a awm chho zel a, education ah Mizoram a fail tih chu pawm ngam a tul tih a sawi bawk.
