Printing & Stationery Minister Pu F. Rodingliana’n nimin khan Mizoram sikul naupang zirlaibu chhutna hmun Guwahati ami tlawhin a hun taka zirlaite hnena zirlaibu semchhuah a duh thu a sawi. Pu F. Rodingliana hian sikul zirlaibu chhut mekna printing press hrang hrangte tlawh kualin a endik a, zirlaibu chhutna hmunpui ber Guwahati daia awm Saraighat Photo Types Pvt.
Ltd., Panikhaiti-ah company neitu hrang hrang te nen an inkawm bakah Assam chanchinbumite pawh kawmin Guwahati a tlawh chhante leh Mizoram Sorkar hmachhawpte a hrilh a, sikul naupang zirlaibu chhut mek chu ngaih pawimawh ngai bik a nih thu sawiin, zirlaibu quality ṭha siam a tul thu leh a hun taka zirlai bute zirlaite hnenah sem chhuah a nih theihna turin a hmun ngeiah a enfiah thu Minister hian a sawi a ni.
Minister hi Deputy Controller, Printing &Stationery Department Pi Josephine Zonunsangi leh Principal cum Project Manager, Printing & Stationery Department Pu Vanlalmuanchhana te bakah Guwahati Mizoram House Deputy Resident Commissioner Dr Malsawmtluanga Fanchun ten an tawiawm a ni.
