School Education Minister Dr Vanlalthlana chuan kumin HSLC Exam-a zirlai pass awm lohna sorkar sikul-ah te hma lak a nih tur thu a sawi. He thu hi vawiina a pisa a Chanchinbu mite nena inkawm hona an neihah sawiin, Education Minister chuan zirlai pass awm lohna sorkar sikul te chu Directorate of School Education lamin a chhan chiang taka an zawh tur thu leh chuta tanga hmalak a nih tur thu a sawi a, zirtirtu indaih lohna sorkar sikulah pawh a theih ang ang a zirtirtu sem rual an tum thu a sawi bawk.
Chanchinbu mite zawhna chhangin Minister chuan sorkar sikul chu a mamawh apiangte sikul a nih angin, zirlai naupang sorkar sikul a lut duhte entrance exam hmanga thlan an nih ve loh avanga zirlai a thiam thiam lak an nih thin loh thu a sawi a, chu chuan kawng eng emaw chenah result pawh a pawh fual thin thu a sawi bawk. Dr. Vanlalthlana chuan session tharah pawl 9 leh pawl 10-ah te ‘intodelh” inzirtir an tum thu a sawi a, vocational education lamah pawh nasa lehzuala ke an pen tur thu sawiin ZPM Manifesto a tel, UPSC Grooming lam hawi zawnga hma an lak tan tak tak tur thu leh zirlai pawl sawm pass-tawhte chu he UPSC Grooming hmanga pawl 11 atanga an chher tan tur thu a sawi a, Mizoram Education Service chungchang pawh sawiin Mizoram Education Reforms Committee kutah a awm mek thu a sawi.
Education Minister chuan Matric exam pass ta zirlaite chu a lawmpui thu leh hlawhtling ta lo te pawh beidawng mai lova, exam lo awm leh tur atana an theihtawp chhuah chhunzawm zel tura a duh thu a sawi bawk.
