April ni 19-a Mizoram Lok Sabha bial inthlanna a vote tlate Thawhlehni zing dar 8 atanga chhiar tan turah naktuk zing hian counting official-te duty-na tur siam fel a ni ang Election department hotute hnen atanga thu dawn danin naktuk zing dar 5 hian counting official-te vote chhiarna dawhkan tur software hmanga chinfel (randomisation of counting officials) a ni dawn a. Hemi hnu hi chuan Thawhlehni, June ni 4 zing dar 8 a vote chhiar tan thei turin ruahmanna engkim peih fel a ni tawh dawn a ni. Vote chhiar tur hian Returning Officer, Assistant Returning Officer, Counting Supervisor, Counting Assistant, Micro-Observer leh vote chhiar hna a tangkai tur dang, an vai-in mi 2,000 thelhin vote chhiar hna hi an thawk dawn a.
Vote chhiarna hmunte hi venghimtute’n thuah thumin an veng dawn a ni. Counting centre hi 13 a awm dawn a, 3 chu Aizawl district ami a ni a, a dang zawng chu district 10 hmunpui-ah pakhat theuh a awm ang. Assembly bial 40 tan Counting hall 40 a awm ang a. Vote chhiarna dawhkan 379 a awm bawk dawn a ni.Vote chhiarna dawhkan pakhat zelah hian counting supervisor, counting assistant leh micro-observer te an awm ang a, Election Commission of India in Observer atana a ruatte’n an vil bawk ang. Aizawl centre-ah te chuan zing dar 8-ah postal ballot a vote tlate chhiar tan a ni ang a. Darkar chanve hnu-ah Electronic Voting Machine (EVM) a Control Unit a vote tlate chhiar chhunzawm a ni ang.
District hmunpui dangah erawh chuan EVM a vote tlate dar 8 atanga chhiar tan nghal tur a ni. Assembly inthlanna-ah khan assembly bial khata polling station pakhat zel a EVM (Control Unit)-a vote tlate chu VVPAT a vote neite’n an vote-na lehkha them lo chhuak nen a inmil em tih endik vek a ni a. Lok Sabha inthlanna a vote tla chhiarna-ah erawh chuan assembly bial khata polling station 5 zelah EVM a vote tla leh VVPAT a lehkha themte hi a inmil em tih endik vek tur a nih avangin vote chhiar hun chhung a tirei deuh dawnah ngaih a nih thu Election department hotute chuan an sawi.Inthlan result hi district hmunpui tina media centre atanga puan chhuah zel a ni ang a. Aizawla Chief Electoral Officer pisa atangin a belhkhawm puan chhuah zel tum a ni bawk a ni.
