Thla leh ni 19-a village council leh local council term tawp hma a inthlang thei tura inbuatsaihna-ah VC leh LC electoral roll chu tun thla ni 8 (Nilaini) hian tihchhuah a ni dawn. State Election Commission hotute hnen atanga thu dawn danin VC leh LC inthlang thei tur hian sorkarin an hun pawh tawi a puan hma atang tawh khan electoral roll hi buatsaih chhoh a ni tawh a. Tunah hian a hmawr bawk tep tawhin Nilaini khian inthlanna atana hman theih turin tihchhuah (final publication) a ni dawn a ni. Electoral roll peihfel a nih hnu hian VC leh LC inthlan hi puan thuai a nih rin a ni a. VC inthlanah hian autonomous district council huam chhunga VC-te tel lovin Mizoram pumah inthlan buatsaih a ni dawn a.
VC leh LC inthlan inbuatsaih dan leh an inpuahchah tawh chin chungchangah state election commission chuan district tin bawrhsapte biakhmuhtheih hmangin a lo sawipui tawh bawk a ni. Puan tawh thin angin tun VC hun hi kumin August thla chawhnu thleng a nih lai-in sorkar chuan a pawh tawisak a, February ni 19 a an hun hi tawp turin November ni 20 khan local administration department (LAD chuan hriattirna a chhuah a. Thla 6 zeta VC hun pawh tawi hi eptu party-te leh The All Mizoram Village Council Association (AMVCA) chuan an dodal a, AMVCA phei chuan Gauhati High Court-ah khinna an thehlut a ni.
Tun hnai a VC thar siamte tiam lovin kum 2020 a VC inthlanah khan VC 533 a awm a, tunah chuan siam tharte nen a vai a inthlan buatsaih a ni dawn a. LC hun kal mek pawh tawi chungchang hriattirna hi thla hlui mai khan UD&PA department chuan a tichhuak ve leh a ni.
