Vice President Jagdeep Dhankar chuan hlawhchham hlauh lohna chu hlawhtlinna bulpui ani a ti a, India ramin Ram hausa leh ram changkang 2047 a thlen hunah Mizoram thalaite chu a thawh hlawk ber zingah tel tum turin a duh tih vawiina Mizoram University Convocation vawi 18-na a hmanpuinaah a sawi. Vice President chuan Mizoram chu khualzin hiptu tha tak a ni thei tih leh Tourism hub tha tak a ni dawn a ti a, intluk tlanna a pawimawh thu sawiin, eirukna do tlat turin zirlai kalkhawmte chu a chah a, an ngaihtuahnate tihniam loa, theih loh an neilo tih hre reng turin a duh tih sawiin Mizoram chu ram nuam tak, a mi chengte pawh inpawh taka an awmna hmun ani a ti a, a ram leilungin a zir avangin khualzin hiptu tha tak a ni thei tih a sawi a ni.
Jagdeep Dhankar chuan Mizoram chhunga mi leh zirlai te chu midang te aia tang zawk tura chahin an hmaah tih tur leh hmalak tur tam tak a awm a ti a, Act East India hnuaia hmalakna hrang hrang te a tahtawlin tihhlawhtlin mek a ni tih sawiin thawh tur tam tak hengah te hian a awm dawn a ti a, Thalaite chu India Ram hmasawn leh than nasat lai takin an vanglai an hmang chu an vannei a tih thu a sawi a. India ramin Ram hausa leh ram changkang 2047 a thlen hunah Mizoram thalaite chu a thawh hlawk ber zingah tel tum turin a chah a ni.
Jagdeep Dhankhar hian gold medalist mi 56 zinga mi 10 hnenah leh Ph.D hmu thar mi 10 hnenah lawmpuina a hlan bawk a, Mizoram Convocation vawi 18-naah hian degree dawngtu mi 7980 an awm a, a hmunah mi 1104 an tel a ni. Mizoram Convocation vawi 18-naah hian Mizoram Larsap leh MZU Chief Rector ni bawk Dr Hari Babu Kambhampati, Chief Minister Pu Lalduhoma leh Babasahep Bhimrao Ambedkar University chancellor ni thin Dr Prakash Bartunia-te chu khualzawhawm an ni bawk. Convocation programme tan hma hian Vice President hian MZU Campus-ah Herhse thing tiak a phun hmasa a ni.
