Vice President Jagdeep Dhankhar chuan sorkar Look East Act East policy chu thil thlak danglamtu a nih thu sawiin, kum 10 liam ta chu hmarchhak tana hun duhawm, Golden Era a ni tih vawiina Mizoram Legislative Assembly thutkhawmah a sawi. Vice President chuan kum 11 liam ta ah India ram economy chu khawvelah 11-na a ni a, tunah chuan pangana a nih tawh tih sawiin Canada, UK leh France ramte hmaah a awm a ni, a ti a, kum hnih thum a liam leh hnuah chuan India ram chu khawvela ecomony ram lian pathumna, Japan leh Germany-te ai pawha economy lian zawk a nih tawh dawn thu a sawi.
Jagdeep Dhankhar chuan a vawi khatna atana assembly-a member pathum hmeichhia an nih chu inchhuanna tur a nih thu sawiin, hmeichhe kaihhruai hmasawnna lam chak takin kan pan a ni, a ti a, nikum September ni 20 leh ni 21 khan Lok Sabha leh Rajya Sabha chuan Lok Sabha leh state legislature-a hmun thuma thena hmun khat hmeichhiate tana reservation siamna tur ‘Nari Shakti Vandana Adhiniyam’ a pawm thu a sawi bawk.
Vice President Jagdeep Dhankhar chuan PM-DevINE scheme hnuaiah cheng vaibelchhe 600 sengin Aizawl bypass road leh bamboo link road siam mek a ni tih a sawi a, PRASHAD Project hnuaia Chite-a Aizawl Convention Center sak tur leh bamboo link road pahnih suam tur chuan Mizoram chu tourism lamah hma a vawrh dawn tih a sawi bawk a ni.
