Ni khat chama lo zin tum Vice President Jagdeep Dhankhar chuan naktuk chawhnu lamah Assembly inkhawmah thu a sawi dawn. Assembly Secretariat atanga thu dawn danin Mizoram University Convocation a hmanpui zawh hnu-ah chawhnu dar 12 leh minute 45 chiaha Assembly House lo lut tura ngaih a ni a. Chutih laiin hun ruahman lawk hi tihdang lam a ni lovang tih a sawi theih loh niin an sawi thung a. Ruahman lawk ang chuan Assembly inkhawm hi chawhma dar 10 leh a chanve-ah tanin zawhna leh chhanna hun hman a ni ang a. Committee lehkha pawimawhte House dawhkana dah a nih hnu-ah Assembly Financial Committee te inthlanna tur chungchang motion chu Parliamentary Affairs Minister Pu Vanlalthlana’n a pulut ang a, Taxation Minister Dr. Vanlalthlana’n “The Mizoram Goods and Services Tax (Amendment) Bill, 2024,” chu House a sawi a pawmpui turin a pulut ang.
Vice President-in House chhung a lo luhin Assembly Speaker Pu Lalbiakzama’n lawmna thu sawiin House Leader Pu Lalduhoma’n thu a sawi ang a. Hei hi Vice President thu sawiin chhunzawmin thu a sawi zawhah Assembly member-te’n Vice President hi a huhovin thla an lakpui ang. Jagdeep Dhankhar hian Mizoram assembly-ah thu a sawi a nih chuan India Vice President zinga a pahnihna a ni ang. Kum 2022 March ni 10 khan khatihlai a Vice President M. Venkaiah Naidu chuan Assembly-ah thu a lo sawi tawh a. Hemi tum hian larsap Hari Babu Kambhampati, khatihlai a Chief Minister Pu Zoramthanga, Deputy Chief Minister Pu Tawnluia, Speaker Pu Lalrinliana Sailo, Minister leh MLA-te House chhungah an awm a ni.
Mizoram Assembly-ah hian President 3-in thu an lo sawi tawh a. Kum 2005 September ni 24 khan Dr AJP Abdul Kalam chuan thu sawiin President zinga Mizoram Assembly a thusawi hmasa ber a ni a. Ram Nath Kovind khan kum 2017 November ni 30 khan thu a lo sawi tawh bawk a. Tuna President ni lai Droupadi Murmu hian kum 2022 November ni 4 kan thu a lo sawi tawh bawk a ni.
