Village Council term pawh tawi chungchangah High Court chuan Mizoram sorkar insawifiah turin a hriattir. All Mizoram VC Association (AMVCA) President Pu K. Lalngaizuala chuan VC term pawhtawi chungchanga sorkar an kinna chu High Court in nimin khan a ngaihtuah a, sorkar chu insawifiah turin a hriattir tih Akashvani a hrilh a. Pu K. Lalngaizuala chuan kar khat chhunga insawifiahna, counter affidavit thehlut tura High Court in sorkar a tih thu sawiin, hei hi January ni 23 aia tlai lova thehlut tura a tih thu leh tun thla ni 30-ah chuan an inkhinna hi chinfel a nih theihna turin High Court in ruahmanna a siam thu a sawi a ni.
AMVCA President chuan State Election Commission in VC/LC inthlan hun puang mahse, High Court thu chu a kal ngaia a kal reng dawn thu leh inthlan hun puan ni mah se High Court-ah VC ten hnehna an chan chuan inthlan theih a nih dawn loh thu a sawi a ni. Puan tawh angin All Mizoram VC Association chuan an President Pu K. Lalngaizuala hmingin nikum November ni 21-a sorkarin VC term thla 6 a a pawhtawina order chu an khing mek a.
Thubuai hi a tirah sorkar order hmasa khinna anga thehluh a nih avangin AMVCA chuan an hnukkir a. Sorkar order hnuhnung zawk khinna tur thehlut lehin thubuai ngaihtuah ni tura ruat tun thla ni 13 khan AMVCA chu dan ang taka register a nih loh avangin hemi ni vek hian an inhnukdawk leh a. A tuk, tun thla ni 14 khan thubuai hi an President hmingin an thehlut leh a, nimin khan High Court chuan sorkar chu insawifiah turin a ti ta a ni.
