Mizoram district 9-a Village Council leh Local Council inthlanpui chu thla thar, February ni 12 ah neih a ni dawn tih vawiin khan State Election Commissioner Dr H Lalthlangliana’n a puang.A pisa a thuthar thehdarhtute hma ah vawiin khan State Election Commissioner chuan Autonomous District Council pathum huamchhung district pahnih, Lawngtlai leh Siaha district tih loh, district dang zawngah kumin 2025 February ni 12, Nilaini khian Village council leh Local council inthlanpui neih a ni dawn tih a puang a, vawiin atangin heng district pakua ah hian Model Code of Conduct hman nghal a ni.
He inthlana chuh tum te tan tun thla January ni 23 tlai dar 3 thleng hming pek theih a ni ang a, February ni 12 zing dar 7 atanga tlai dar 4 thleng vote thlak a ni ang a, hemi zan vek hian vote chhiar a ni nghal dawn bawk a, February ni 14 ah VC leh LC sorkar din fel tur a ni bawk a ni. District 9-a Village Council leh Local Council term chu sorkar ruahman angin thla thar February ni 19 ah a tawp dawn a, State Election Commissioner Dr H Lalthlangliana chuan VC leh LC term pawh tawi leh pawh sei chu SEC thu nilovin sawrkar thu a ni a ti a, inthlan chu a term tawp hmaa neih tur a nih angin, SEC chuan inthlan hi a huaihawt mai dawn a ni a ti.
Inthlan neihna turah hian VC 544, awmah seat 2416 a awm a, Aizawl Municipal Corporation leh Lunglei Municipal Council hnuaia LC 111 awmah seat 723 a awm a, a pumpui ah vote nei nuai 4, sing 3, 9409 an awm a ni. Tun tum LC leh VC inthlanah hian Village Council hnuaiah hmeichhe tana seat reserve 613 a awm a, Local Council-ah chuan hmeichhe seat 195 a awm a ni.
