Tuna village council leh local council ding laite hun thla 6 vela pawh tawi a inthlanna buatsaih hma turin inpuahchahna kalpui mek a ni. VC leh LC inthlanna buaipuitu state election commission chuan Zirtawpni khan VC leh LC draft electoral roll chu a tlangzarh a, VC leh LC electoral roll final publication hi nakum January ni 8 a tarchhuah tura ruahman a ni.
State election commission thuneitute chuan VC leh LC inthlanna atana hman tur electoral roll hi assembly leh parliament inthlanna atana electoral roll ennawn nena ngaih pawlh loh tur a nih thu an sawi a. Naktuk atang hian electoral roll a awm lote’n thun an duh thu leh sawiselna awmte thehluh hun a intan ang a, He hun hi December ni 9 thleng hawn a ni ang. Claim and objection te hi December ni 20-ah chinfel tura ruahman a ni ang a, Nakum January ni 8-ah VC leh LC inthlanna lo awm tur atana electoral roll hman tur chu tlangzarh a ni dawn a ni.
VC leh LC hun hi kum 5 a ni a. Inthlan hnuhnung ber khan August ni 17, 2020-ah vote thlak a ni a. Covid hrilen vanglai a nih avangin LC 27 leh VC 8 te hemi ni hian vote an thlak thei lova, a hnu-ah erawh an inthlang ve ta tho a ni. Tun hnai khan Local Administration department chuan hriattirna chhuahin tuna VC term hman mek hi nakum February ni 19 thleng chauh ni turin a puang a. Sorkar hian VC inthlan ruala LC inthlan a nih ve nghal theihna turin hriattirna a chhuah ve thuai dawn ni a thu dawn a ni.
