Kangmei ven hapta hi Aizawlah chuan Synod Conference Hall-ah hun hman niin, Chief Minister Pu Lalduhoma chuan “Kangmei Ven Hapta” hi a hawng.Chief Minister chuan, Mizo pi leh pute khan ram kang pawizia an hriat avangin Lo leh huan an hal dawnin tha takin Meilam an sial tih sawiin, Meilu khaiin an hal chauh thin, a ti. Vanduai thila kangmei a chhuah palh pawhin a pachhuakin a thelh turin an bei vata, rang takin an thelh leh thin niin a sawi. Thangthar fing zawka ngaihte ram an ti kang nasa nia sawiin, fimkhur loh avanga ti kang thin hi en liam a har em em a ni. a ti bawk. Pu Lalduhom chuan ngaihtuahna thar pua kangmei laka Mizoram venghim tura thapui thawh thar turin mipuite a sawm a. Fimkhur loh vang te, suahsual vanga ram tikangte phei chu an chungah dan anga hma lo la ngei turin hmuntina dan lekkawhtute a chah a ni.
State Level Committee on Fire Prevention te, District Level Committee leh Village Level Committee te, tlawmngaipawl leh ramkang venhimna lama mi thahnemngai zawng zawngte; hapta hman chhunga hmalakna tha tak lo nei tur leh hapta zawh hnuah pawh lo bawhzui zel turin a chah a. Mizoram hi vawiin leh naktuka chhuan lo la awm zel turte tan chenna tlak ram thaah siam tum ngei tur a ni, a ti. Environment & Forest Minister leh State Level Sub Committee on Fire Prevention Chairman ni bawk Pu Lalthansanga pawhin thu a sawi.Saitualah pawh tukin khan Saitual District Fire Prevention Committee huaihawtin Kangmei venna Hapta DC Bungalow tualah hman a ni a, kumin hian “Thapui thawhin kangmei i veng ang u” tih thupui hman a ni. Hun hmanpuitu, Khuallian ni bawk, Addl.DC Pu Lallawmawma chuan lo hal avangin kangmei a chhuak nasa zual tih a sawi a.
Sawrkarin lo hal hun a ruat ngai pawimawha kangmei chhuah hlauhawm zual lai chu a veng leh khua a zirin District Level Committee pawhin venpui ni thei se hmasawnna a thlen a rin thu sawiin, VC-te chu kangmei tichhuakte laka hremna dan awmsa chu hmang hreh lo turin a hriattir. Member Secretary Asst. Conservator of Forest (ACF) Pu PC Lianzuala Report pek danin sawrkar leh District Level Committee ruahman angin lo hal huna ruat a tarlang a, Saitual District huam chhungah leipui hal hun atan March ni 5, VC țheh ram hal hun atan March ni 15 leh Hmunphiah huan neite tan March ni 31 aia tlai lovah hal țheuh tur a nih tih a sawi a, Kangmei venna kawnga hma la țha zual khaw pathum hnenah lawmman ruahman a nih thu a tarlang bawk.
