National Tobacco Control Programme, National Health Mission te leh Aizawl Traffic Police te buatsaihin “Training on Tobacco Control for Law Enforcers (Traffic Police)” tih chu SP Aizawl Conference Hall-ah neih a ni. He hun hi Dr. H. Lianthangpuia, State Nodal Officer, National Tobacco Control Programme chuan a kaihruai a, he hunah hian Pu Stephen Lalrinawma, MPS, Sr. Superintendent of Police, Traffic chu Special Guest a ni bawk.
Pi Vanlalzari, State Legal Consultant, National Tobacco Control Programme chuan “Vaihlo khuahkhirhna dan leh a kaihhnawih” dan hrang hrangah powerpoint presentation hmangin zirtirna hun a hmang a ni. Tunlaiin, public transport hrang hrangah te meizuk ching kan la awm thin a, heng Taxi, Maxi Cab, City Bus etc-ah te hian meizuk khap tlat a ni a, meizu man an awm a nih chuan dan ang ₹200/- thleng pawisa chawitir a hrem theih an ni.
Heng public transport driver hrang hrangte pawhin he khapna dan hi zawm theuh ila, kan motor chhungah kan passenger te pawhin meizuk an tum pawhin phallo ngam theuh turin an ngen thar leh bawk a ni. Hemi piah lamah hian puipunna hmun hrang hrangah meizuk hi khap tlat a ni bawk a, mitinte he khapna dan hi tha tak a zawm theuh turin an ngen nawn leh vek bawk a ni.
