Health Minister Pi Lalrinpuii chuan pawisa pe lawk lova damlote inenkawl theihna tura sorkar tharin a duan, Universal Health Care System chu Asian Development Bank (ADB) nena inremna ziah hnu-ah hman tan theih a ni ang a ti.
Tun hnai a Assembly inkhawmna MNF member Pu Ramthanmawia zawhna chhangin Pi Lalrinpuii chuan he Universal Health Care System atan hian ADB leh Mizoram sorkarin inremna a ziah hun huna hman theih tura ruahman a nih thu a sawi. Hemi atan hian sorkar hmasa hunlai atang tawh khan ADB atangin cheng vaibelchhe 1,000 puk turin ruahmanna kalpui a ni tawh a. Tuna health case ruahmanna tharah hian damdawi-ina inenkawlna senso pe lawk lova inenkawl theih tura duan a nih bakah sorkar hnathawk leh pension tawhte pawh huamtir tura ruahman a ni. Tun dinhmunah hian sorkar hmasa-in a hman Health Care Scheme hnuai-ah damlo 2,129 te bill batsak a la ni a. Heng mite bill batsak zawng zawng hi cheng vaibelchhe 9 leh nuai 84 chuang a ni.
Sorkar hmasa hunlai a health care scheme khan sawisel a hlawh nasa hle a. He ruahmanna hnuai a inziaklutte’n pawisa an chawi chung leh SDEP atangin cheng vaibelchhe 150 zet dah a ni chungin an inenkawlna senso hmu let thei lo an tamin damlo an pek theih loh bill ba khan cheng vaibelchhe 80 dawn dawn a kai hial thin a ni. Tuna Universal Health Care System duan tharah erawh hi chuan damlote’n a ba-in an inenkawltir thei dawn a, mipui mimir harsatna tam tak sukiang thei tura ngaih a ni a. Hetih lai hian mimal enkawl damdawiin thuneitu thenkhat erawh chuan sorkarin an damlo enkawlna senso an rul mai lovang tih hlauvin he ruahmanna a sorkar nena inremna siam chungchang chu ngaihtuah chian deuh ngai a an hriat thu an sawi ve thung a ni.
