Ni hnih cham tura lo zin Union Minister of State for Health & Family Welfare, Professor S.P. Singh Baghel chuan vawiin khan CEM, MADC Residential Conference Hall-ah Siaha NGO- Mara Thyutlia Py (MTP) leh Mara Students’ Organization (MSO) hruaitute a kawm. Professor S.P. Singh Baghel chuan MTP leh MSO – te hnathawh leh hmalakna, khawtlang tana an inpekna chu fakawm a tih thu a sawi a. Mara hnam tana an hnathawh chu mipuiten an hre reng tawh ang a ti a. Hmalam hunah pawh theihtawp chhuah zel turin a chah. Mara Thyutlia Py ( MTP) hruaitute hian kumina ‘Platinum Jubilee’ an lawmna tur leh Youth Festival- hmanna tur atana an mamawhte bakah chhimtuipui a tui tla an awm chang a mawhphurtu ber pakhat an nih avangin ‘life saving board’ – an mamawh thute an thlen a. Mara Students’ Organization (MSO) hruaitute pawhin ‘Conference’ an hmanna tur leh mamawh dang an neih ang angte an thlen bawk a ni.
Union Minister of State hian an thu thlente a ngaihpawimawh thu lo hrilhin, Delhi -a thlen hunah theihtawp a lo chhuahpui dawn tih NGO hruaitute hi a lo hrilh a ni. Union Minister of State Professor S.P. Singh Baghel hian Maraland Gospel Centenary Hospital- a tlawh nghal a. Charity Hospital- an nih angin mipuite tana an rawngbawlna chu ropui a tih thu a tarlang a. Maraland Gospel Centenary Hospital- in sawrkar laipui atanga tanpuina tam zawk an hmuh theihna turin theihtawp chhuahpui a intiam tih a sawi a.
Mipui tamzawk thleng phak rawngbawlna an neih theihna turin Pradhan Mantri Jan Arogya Yojna (PM-JAY) hmang ve thei tura hma lo la turin a chah bawk. Professor S.P. Singh Baghel, Union Minister of State for Health & Family Welfare- hian Maraland Gospel Centenary Hospital- a thawh zawh hnu hian CEM Bungalow- pan nghalin, Pu M. Laikaw CEM, MADC- in a puala zanriah a buatsaih chu an kilho nghal a ni.
