Union Minister of State for Tribal Affairs Pu Durgadas Uikey chuan Prime Minister Narendra Modi-a kaihhruai sorkarin hmasawnna tam tak a thlen thu leh zirna lamah pawh nasa taka hma a lak thu a sawi. Vawiina Aizawl Tlangnuam venga Eklavya Model Residential School (EMRS) a tlawhnaah he thu hi sawiin Minister chuan zirna lama an sorkar hnathawh zinga pawimawh tak chu EMRS a nih thu a sawi a. Minister chuan Tlangnuam venga EMRS chu a hna thawhah duhthusam lohna a awm nual thu sawiin contractor te chu uluk taka an hna thawh hun bi tawp hun, kumin March thla hmaa hnum tha taka hna zo turin a hrilh a. Tribal naupang ten zirna an hmuhna tur a ni tih hriaa an hmakhaw ngaia hna thawk turin a hrilh a, harsatna an neih chuan sawi zel turin a hrilh a ni. Contractor te pawhin an harsatna sawiin a panna kawngah harsatna an tawh thu leh tui a awm that loh thu an sawi bawk a ni.
School thawktute bakah department hotute chu an harsatna hrilh zel turin Minister chuan a hrilh a. An harsatna te an thlen zel chuan rang taka an mamawh phuhruk sak a tiam a. Zirtirtute chu fuihin zirtir hna chu hna pawimawh tak, mi nun thlak hlawk thei tu a ni tih hre renga inpekna nena theihtawp chhuaha hna thawk turin a hrilh a ni. Mizoram EMRS Society Chief Executive Officer leh Social Welfare & Tribal Affairs department Director ni bawk Dr. Lalhriatzuali Ralte pawhin thu sawiin Tlangnuam EMRS panna kawng chu fehkawng chei that mai chauh a la nih avangin duh thu sam a la nih theih loh thu a sawi a.
Tunah hian Article 275 hnuaia a panna kawng zal nuam zawk sakna tur an dawn hmangin kawng sial hna tan mek a nih thu a sawi a. Tun dinhmunah school hmunah tui a awm that loh avangin ruah tui khawlna tur ngaihtuah sak turin Minister a hrilh a. Mizoram chhunga EMRS te hmasawnna tur leh din belh zel dan tura an mamawh hrang hrang Minister hi a hrilh bawk a. Kum 2023-24-ah EMRS school 6 chu bul tan a nih tawh thu leh, zirlai 1210 an awm thu a sawi a, kum 2024-25 session atan school 5 bul tan leh mek a nih thu leh tunah hian school sak mek, school 5 bakah sak thar tur 6 a awm thu a sawi a. RD block 9-ah EMRS din a nih theih nan rawtna thlen mek a nih thu a sawi bawk a ni.
