Union Minister of Agriculture and Farmers Welfare Pu Shivraj Singh Chouhan chuan, vawiin khan Central Agricultural University (CAU) Imphal hnuaia College of Horticulture, Thenzawla awm Administrative-cum-Academic Building chu video conferencing kaltlangin a hawng.
Union Minister chuan Mizoram leilung chu a mi cheng te tana tangkai tur takin a awm a ti a, ruahtui an dawn that avangin thlai a that duh tih sawiin thlai chin hrang hrang eizawnna tlak tam tak a awm a ti a, kuthnathawktute chu sawrkar atanga tanpuina hrang hrang te hrechiang a, an hmasawnna tur atana thawhho a pawimawh tih sawiin sawrkara mawhphurtu te pawh theihtawp chhuah turin a chah a ni.
Union Minister chuan Mizorama Oil Palm tharchhuah tam tak a awm avangin a chingtute tan hlawkna tam tak a awm a ti a, hei hian state economy nasa takin a than tir tih sawiin kum 2021-2022 inkarah agriculture and allied sectors atangin ₹6,13,716 lakh hmuhchhuah ani a ti bawk.
Union Minister chuan huanthlai hmanga kutkawih eizawnna mipuiten uar thar a pawimawh tih sawiin Mizoram chuan theihna sang tak a nei a ti a, tlangram lo neiha eizawn ban san nan organic farming chu thil tha tak ani tih sawiin hemi kawngah hian hma thar lak a tul thu a sawi bawk.
Minister chuan vawiina a hawn tak College of Horticulture ah hmasawnna tam tak a awm tih sawiin hmarchhak zirlai ten hlawkna tam tak an hmuh zel theih nan duhsakna a hlan tih a sawi bawk.
He huna khualzahawm Chief Minister Pu Lalduhoma chuan, Union Minister chu a kaihhuaina leh inpekna Mizoramin a chhawr thu a sawi a. A bik takin a hruaina hnuaiah India ramin agriculture lam zirnaah nasa takin hma a sawn a ni a ti. Chief Minister chuan Thenzawla Horticulture College chu zirna hmun duhawm leh a din tirh phat atanga zirna lama nasa taka hmasawn a nih thu a sawi a. Selesih a College of Veterinary Science & Animal Husbandry-a hmeichhe hostel hawn thar a ni chuan mipa leh hmeichhe inthliarna awm lo, hmeichhiate pawhin zalen taka zirna an rahna hmun tha a ni tih a tarlan thu a sawi a, vawn nun zel a pawimawh a ni a ti a. Selesih College of Veterinary Science & Animal Husbandry Residue Analysis Laboratory din turin tunhnaiah sorkarin sum a ruahman thu a sawi a, hei hi ram thatna tura sorkar, khawtlang leh zirna in te tanrualna duhawm tak a ni a ti.
Central Agricultural University, Imphal hnuaia din College of Horticulture, Thenzawl hi kum 2016 khan bultan a ni a, tun dinhmunah Under Graduate in Horticulture zir theih niin Mizoram hian quota 4 a nei a, hmarchhak state dang nen quota insemin lut tur chuan Higher & Technical buatsaih SMATEE Exam tlin a ngai a ni.
College-ah hian thawktu mi 15 awmin naupang 95 zirlai an awm a, zirna hmun changtlung tak niin zirlai mithiam tak tak an lo chher chhuak tawh a ni.
