Vawiin khan Sector 23 HQ Assam Rifles, Khatla-ah Aizawl khawpui laili atanga Zokhawsanga Assam Rifle te sawn pheina official function buatsaih a ni a. Union Home Minister Pu Amit Shah chuan he hun hi a rawn telpui. Thu a sawinaah Pu Amit Shah chuan, kum sawm thum panga vel zet Mizo mipuite duhaisam lo ni tawh thin, Aizawl khawpui laili atanga Zokhawsanga Assam Rifles sawn chhuah chu kan lo tihlawhtling dawn ta a. He hmalakna hi Assam Rifle Camp sawnna a ni satliah lo va, Aizawl duhawm zawk a awm theih nana hmalakna a ni. Mizoram mipuite ka lawmpui a, tangkai taka in hman ka duhsak che u a ni. He hmalakna hi kum1890 a Aizawla sipai an awm tirh atanga vawiin inkara Aizawl hmasawnna tura thutlukna chhinchhiah tlak ber a tlingin ka ring a. Hei hian Prime Minister Pu Narendra Modi kaihhruai sawrkarin Mizo mipuite duhna a ngaihpawimawhzia leh in tana a inhawnzia a tilang a ni. A taka a hlawhtlin theih nana theih tawp chhuaha hma la tu Chief Minister Pu Lalduhom leh Lt. Gen Vikas Lakhera, DG AR te chungah ka lawm hle a ni, a ti bawk. Pu Amit Shah hian sawrkar laipuiin Mizoram hmasawnna tura hma a lakna langsar tak tak; Vairengte to Aizawl kawngpui 4 lane a siam mek thu te, Aizawl to Tuipang double lane a sial mek a nih thu te, Sairanga Rel station buatsaih mek a nih dan te leh Mizorama sawrkar laipui hmalakna dang te a tarlang a. India hmarchhak huapa Prime Minister Pu Narendra Modi kaihhruai sawrkar hmalakna te pawh a tarlang bawk.
Chief Minister Pu Lalduhoma pawhin thusawiin, Assam Rifles sawn chhuah an nih theih nana hma a lakna te avangin Pu Amit Shah chungah lawmthu a sawi a, a thil tih chu Mizo mipuite thinlunga chamreng tawh tur hmalakna ropui a ni, a ti. Inpawh tlang taka inbiakna neia, engkimah a indawrpui thin avangin Lt. Gen Vikas Lakhera, Director General of Assam Rifles chungah te, Union Home Secretary Pu Govind Mohan leh Pu Tapan Deka, Director, IB te chungah lawmthu a sawi bawk. Chief Minister chuan, Mizoram chu tlangram a ni a, kan khawpui Aizawl hi a thang chakin mipui kan pung chak si a, vantlang hmun indaihlohna te, infrastructure lam indaihlohna te a nasa hle mai a. Chuvang chuan khawpui laili taka awm Assam Rifles te hi hmun dangah suan mai ni se tih hi mipuite thinlungah hun rei tak a lo awm tawh a ni. Assam Rifle te ngaitheihlohna emaw duh lohna vanga he ngaihtuahna hi lo awm a ni lo va, hmasawn zel tura kan mamawhna vanga lo awm zawk a ni. Khawpui lailai atanga an insawn avang hian Assam Rifles te hi kan thlah thlam ngai dawn lo va, tha taka thawk hova, a tulna apianga ram tana thawhpui turin kan inpeih reng dawn a ni, a ti. Lt. Gen Vikas Lakhera, AVSM, SM, Director General of Assam Rifles pawhin thu a sawi a, Pu Vanlaldina Fanai, Commissioner, GAD, Mizoram nen Map inhlantawnna an nei bawk. Pu Vanlaldina Fanai hian Zokhawsanga Assam Rifles awmna hmun thar Map a hlan a. Lt. Gen Vikas Lakhera hian an awmna hmun, Mizoram sawrkar hnena an hlan tur Map a hlan ve thung a ni. AR sawn chhuahna programme hi Pu Amit Shah-an Bati chhiin a tan a, Pu Khilli Ram Meena, Chief Secretary chuan kal khawm te lawmna thu sawiin, Assam Rifles leh Mizoram sawrkar inremna tlangpui a tarlang a. Most Revd Rotluanga, Aizawl Diocese chuan hunserh hmangin, Pi Ramdinliani, Secretary to the government of Mizoramin lawmthu sawiin inkhawm a khar a ni.
He hunah hian Pu Govid Mohan , Union Home Secretary, Pu Tapan Deka, Director, IB te bakah Ministry of Home Affairs official pawimawh tak tak te, Mizoram sawrkar official pawimawh tak tak te, Assam Rifles official pawimawh leh chanchinbumi engemaw zat an tel. Nikum October ni 26 a Chief Minister Pu Lalduhoma’n CM Conference Hall-a Press Conference a neihah khan October ni 23, 2024 zan dar 7:00PM a New Delhi Mizoram House-a Assam Rifles leh Mizoram sawrkarin Assam Rifles te Zokhawsanga an insawnna tur inremna (MoU) an ziah fel tak thu a lo puang tawh a. An ram inhlan tur chin leh a tahtawla an inhlan dan tur te pawh, kha mi tum khan chiang takin Press Note tih chhuah a ni.
