UD&PA Minister Pu K. Sapdanga chuan vawiin khan Aizawl Smart City hnuaia project thawh lai mek hmun 8 ami a tlawh. Vawiina Minister-in a tlawh te hi High Field a Multipurpose Ground, Dawrpuia Aizawl City Centre, Zemabawk Playground, Zuangtui Indoor Stadium, Durtlang Playground, Chaltlang Multipurpose Sports Hall, Chaltlang Tourist Lodge leh Hlimen Playground te an ni a. Minister hian a satu contractorte kawmin uluk takin hnathawh kal mek leh hmabak la awmte a zawtfiah a ni. High Field, Zarkawta Multipurpose Ground hi cheng vaibelchhe 16.06 senga sak tur a ni a, contractor chu M/s Lushai Engineers niin February, 2023 a hna thawh tan a ni a, hna hi 71% thawh zawh tawh niin kumin December thla hian zawhfel an inbeisei a, Multipurpose Ground-ah hian Football khelmual (73mx31m), open gym, naupang infiamna hmun, cycling track, elevated jogging track, cricket practice pitch, four wheeler 80 leh two wheeler 47 len theihna tur parking area a awm bawk ang.
Aizawl New Market, Dawrpuia a City Centre hi cheng vaibelchhe 40.35 senga sak tur a ni a, contractor chu M/s Lushai Engineers niin October, 2022 a hna thawh tan a ni a, hna hi 59% thawh zawh tawh niin December, 2026-ah zawhfel an inbeisei a, City Centre-ah hian dawr (stall) 1102 a awm dawn a, mihringb leh bungrua bik tan lift ruahman niin, cold storage, CCTV, ATM, food court, office leh conference room baka four wheeler 31 leh two wheeler 79 len theihna tur parking area a awm bawk ang. Zemabawk Playground (khelmual) hi cheng vaibelchhe 24.94 senga sak tur a ni a, contractor chu M/s Northeast Consultancy Firm Ltd niin November, 2022 a hna thawh tan a ni a, hna hi 79% thawh zawh tawh niin kumin June thla hian zawhfel an inbeisei a, Zemabawk khelmual hi 100m x 60m a zau a ni a, phullem (artificial turf) phah tur niin, gallery mi 700 vel len theihna a awm bawk a, four wheeler 41 leh two wheeler 65 len theihna tur parking area a awm bawk ang.
Zuangtui Indoor Stadium hi cheng vaibelchhe 14.60 senga sak tur a ni a, contractor chu F. Lalliansanga, Aizawl Venglai niin June, 2022 a hna thawh tan a ni a, hna hi 99% thawh zawh tawh niin March thla hian hawn hman tum a ni. Zuangtui Indoor Stadium First Floor-ah hian badminton court 6, gym, gym instructor room, mipa leh hmeichhe tan dormitory (washroom attached) a hrangin a awm ve ve bawk a, player te inthlakna room (locker telin) mipa leh hmeichhe pual a hrangin a awm bawk a, first aid room, coach room leh yoga room a awm bawk a ni. Football khelmual (73mx31m), open gym, naupang infiamna hmun, cycling track, elevated jogging track, cricket practice pitch, four wheeler 80 leh two wheeler 47 len theihna tur parking area a awm bawk ang.
