Transport Minister Pu Vanlalhlana’n two wheeler taxi permit pek chungchang State Transport Authority in a ngaihtuah dawn tih a sawi. He thu hi nimina Assembly thutkhawma zawhna leh chhanna hunah sawiin Minister chuan Aizawl leh hmun dangah pek belh a ngaih leh ngaihloh chuan State Transport Authority in ngun takin a ngaihtuah dawn a ti a, District thar 3 ah DTO office nei turin hmalakna a awm tih sawiin tun dinhmunah an hawn theih lohna chhan chu staff indaihlohna vang ani a ti a, staff lak belhna tur Finance leh DP&AR in phalsak in District thar 3 – Khawzawl, Hnahthial leh Saitual atan Motor Vehicle Inspector 3, LDC 3, Enforcement Sub Inspector 6, Group D staff 3 lak remtih a ni tawh tih a sawi.
Minister chuan Mizoramah Weight Bridge pakhat Vairengte ah a awm mek a ti a, sawrkarin weight bridge dang, Champhai, Kanhmun, Phunchawng ah bun turin hma a la mek tih sawiin Green Hills Infrastructure Mission Veng chu a buaipuitute an ni a ti bawk.
