Nimina ruahsur, thlipui leh rial tla in Mizoram hmun hrang hranga chenna in 368 chuang a ti chhia a, heng chhiatna thleng hi Mizoram chhunga District hrang hranga thleng niin Disaster Management and Rehabilitation department hotute’n an sawi. Sawrkar hotute sawi danin nimina thlipui leh rial tla hian Mizoram hmun hrang hrangah chhiatna thlenin Mizoram chhim lam Lunglei, Siaha leh Lawngtlai bakah Hnahthial te pawh tuamin Serchhip ah pawh chenna in chhia a awm nual a ni.
A tuar nasa ber chu Khawzawl district niin in chhia a awm nual a, Sialhawk khua ah hriat theih chinah in 68 a chhia a, heng zingah hian in 5 chu luah tlak lohin chhuahsan a ni a, Tlangpui khuaah in 55 a chhiain District chhunga in chhia zawng zawng hi 128 a ni. Nimina Thli, Ruah leh Rial thawk vangin, hriattheih chinah Lawngtlai District ah Chenna In 99 a chhia a, Inchhia zinga tam zawk chu thawmthata luahzui tlak a ni a, Siaha District ah in 69 chhia in Aizawl District ah in 40 a chhe bawk.
Mamit District ah chuan chenna in 29 chhia in thlipuiin a nuai zingah hian Champhai leh Saitual District ah chenna in tihchhiat awm mahse an tuar na lutuk lo a ni. Thla hmasa April atanga ruahsur, thli tleh leh rial tla avang hian ramchhunga hmun hrang hrangah in 1200 vel a chhe tawh nia hriat a ni a, heng bakah hian power supply hmun hrang hrangah chhia awmin kawng tihchhiat a awm nual bawk a ni.
