Nimin khan Mizoram Public Service Commission (MPSC) in tunhnaia H&FW Department hnuaia Entomologist hna lakna a kalpui dan chungchangah MPSC a thawktute leh Mizo Zirlai Pawl (MZP) General Hqrs. Hruaitute MPSC Office-ah an inkawm a. He hunah hian MPSC Secretary Dr.H.Lianzela hovin MPSC official 6 an tel a, MZP lam aiawhin an President, Pu H. Lalthianghlima hovin OB mi 4 leh Adviser te an tel a ni.
December ni 12, 2024 a MZP thuchhuahin a tarlan “MPSC-in Entomologist hna a lak dan leh Veterinary Asst. Surgeon hna a lak dan hi chhui chiang a, a tul anga hma la turin Mizoram Sawrkar a ngen a. December ni 20, 2024 ral hmaa hmalakna a awm lo a nih chuan, hmalak zel dan tur a ngaihtuah dawn a ni,” tih chungchang ngaihtuah ho tura inkawmkhawmna leh kumthar thingpui inhona neih a ni.
Boruak tha tak hnuaiah inkawm a ni a, MZP lamin an thil hriat duh leh hriat chian loh an neih hrang hrangte leh dikhlel ni a an ngaih laite thil awmzia diktak hmaichhanah inhrilhfiahna hun hman a ni. MPSC leh MZP hian hun lo kal zel turah thawhhona tha tak nen inpawh taka hmalak ho zel tha an ti tlang a, MPSC zahawmna humhim a nih zel theih nan leh tha taka a kal theih nan thawhdun zel nise an ti bawk.
