Aizawl district bawrhsap thuchhuahin a sawi danin Sinlung Hills Council inthlan thlan tlinte hi Aizawl Bawrhsap Pisa Pui Hall-ah Thawhtanni chawhma dar 11-ah thutiam tira lakluh tura ruahman a ni a. Protem chairman atana thlanin thu hi a tiamtir ang.
Thu dawn danin hemi zawhah hian Sinlung Hills Council chairman tur thlan a ni ang a. Chumi zawhah chuan MNF leh a thawhpui HPC ® atanga thlan tlin mi 7-te chuan sorkarna an siam theih thu chairman hnenah hriattirin an nihna tura lo ruahman lawk angin an inrawt zel ang a. Chief Executive Member (CEM) leh Executive Member (EM) te pawh thutiam tira lakluh nghal turin ruahmanna an siam niin MNF party hruaitute chuan an sawi a ni.
Tun thla ni 5-a Sinlung Hills Council inthlanna-ah khan MNF-in bial 5 an la a, an thawhpui HPC (Reformed)-in bial 2 la-in sorkarna an siam thei a. ZPM in bial 4 la-in Congress in bial 1 an la a ni. Thu dawn danin MNF member Vanbawng bial atanga thlan tlin Pu Ricky Lalremsanga chu CEM a ni dawn a. EM turte a ruat leh dawn a ni.
