Mizoram chaklakna ber Aizawl leh Silchar inkar kawngpui a chhiat lutuk avanga tuialhthei harsatna thleng chuan zia-awm lam a pan chhoh beisei a ni.Food, Civil Supplies and Consumer Affairs director Pi Saizikpuii chuan Silchar leh Aizawl inkar kawngpui chhiat avang leh chumi nghawng a petrol leh diesel phur lirthei khalhtute an nawrh avanga Mizorama tuialhthei harsatna chu a zia-awm chhoh a beisei thu a sawi a. Tunah hian tuialhthei phurtu lirthei tangkhangte an rawn chhuah chhoh mek avangin naktuk, Thawhtanni lam atang hi chuan petrol leh diesel dinhmun a that chhoh leh an beisei thu a sawi a ni. Mizoram chaklakna ber Aizawl leh Silchar inkar kawngpui a bik takin Kawnpui leh Khamrang inkar leh Sethawn a chhiat lutuk avangin tuialhthei leh bungraw phur truck engemawzat a tangkhang a. Kawng chhe zual lai hi PWD-in khawl leh mihring tha hmangin kar kalta Ningani atang khan kawngpui chhe zual lai siamthat hna an thawk tan a, ruahtui a tlak reng tawh loh avang leh a chhe zual lai siamthat a nih tawh avangin Zirtawpni tlai khan Assam lam pan tur truck ruakte chhuahin nimin tlai khan helam rawn pan mekte chu chhuah leh an ni.
Nimin tlai a lo chhote hi a tir lam an tlang theih lai-in zan dar 10 hma deuh khan Kawnpui leh Khamrang inkarah truck pakhat kawng nalah a tang a, hei hian tam tak a dang zui leh a, zing khawvar hma-in kawngpui hi a tlang leh thei ta ni a thudawn a ni. Tuialhthei phurtu pawl Mizoram Oil Tanker Driver Association (MOTDA) leh Petroleum Entrepreneurs and Transporters Union of Mizoram (PETUM) te chuan kar kal ta Thawhlehni atang khan Aizawl leh Silchar inkarah tuialhthei phurte an tlantir lova, mahse, kawng chhe zual lai siamtha tura sorkarin ruahmanna a siam tak avangin an nawrh hi an titawp leh a ni.
Chaklakna kawngpui chhe lutuk avanga lirthei a kaltlang hleih theih loh avang hian tuialhthei a vangin to tak taka hralh a ni a. Mipui nitin mamawh phai lam atanga lakluh pawh lei tur a avangin a man pawh a sang chak hle a ni.
