Tuikual South a cheng, Aizawl News Market a a dawr kudam chhunga nimin chawhma lama thi a hmuh Pi V. Lalhmingthangi thattu ni ngei a rinhlelh Irene Lallawmzuali (34) Ramthar North a cheng mek chu Zemabawk Dinthar veng a a thiannu in atangin nimin vek khan man a ni. Home Minister Pu K. Sapdanga’n nimin chawhnu a chanchinbumite a hrilh danin Pi V. Lalhmingthangi tualthih thu report dawn a nih veleh hian Police leh Forensic team-te chu ruang awmna dawrah kal ngalin,ngawrh takin hnu chhui nghal a ni a. A hmun a thil awmdan leh he thil thleng chhungchanga thu hriat nei awm angte sawi dan atangin Police team hrang hrang insem darh chuan a titu ni ngei a rinhlelh Irene Lallawmzuali chu man a ni ta a.
Tualthattu ni a rinhlelh an man kut atang hian tualthahna atan a hriamhrei hman ni ngei a lang, chemte leh tualthi ta thil neih ni ngei a lang engemaw zat man tel a ni bawk. An mi rinhlelh in Police hma a a thusawi atang chuan ama tih ngei ni in a lang tih Minister chuan a sawi bawk a ni. Nimin chawhma dar 10 vel khan Pi V. Lalhmingthangi (52) Tuikual South ‘B’ muala cheng chu Aizawl New Market-a ZV Market building a a dawr chhungah thi a hmuh a ni a. Police hotute hnen atanga Akashvani Aizawl thudawn danin Pi V.
Lalhmingthangi thattu hian a dawr rawk a tum avanga in nangchinga that ta mai tih leh inhre sa an ni tih hriat a la ni lova. Dawr nghah rei chang a neih avangin a pasal hian mutsan mai chang a nei niin an sawi a. Tukinah ina a awm loh avang leh a mobile phone a an biak dawn pawha a lak theih loh avangin an chhungte chu a dawrah hian an va kal a. Pawn lamah a lo inkalhin dawr kawngkhar bul vela thisen an hmuh avangin a kalhna chhu chhia-in an lut ta a. Thisen tam tak baw nuai karah thi a hmuh a ni ta a ni. Police te’n an chhui zui a. Pi V. Lalhmingthangi ruang hi Aizawl Civil Hospital-ah nimin vek khan post-mortem a ni.
