Vawiin khan Pu Lalnghinglova Hmar, Minister of State, Tourism Department chuan Aizawl leh a chhehvel – Sakawrhmuituai tlang, Durtlang North, Sakeikhawthlir (Durtlang), Muthi leh Laipuitlang-a tourism hmun cheithat tura ruahmante a tlawh a, khawtlang hruaitute nen inkawmin hmalak dan tur ruahmanna an siam.
Minister hi Tourism Department atangin Director Pi R. Lalrodingi leh officer dang ten an tawiawm a ni.
Tourism Minister Pu Lalnghinglova Hmar chuan Mizoram hmun hrang hranga tourism potential nei tha hmun engemawzatte chu cheitha a, tichangtlun turin ruahmanna a awm tih a sawi a. “Sawrkarin a cheithat dan turah ruahman sa deuh nei mah se, a hrechiangtu khawtlang hruaitute rawtna leh duhdante ngaithla a, a tha thei ang ber nei tura remruat ho turin kan lo kal,” tiin, hmunhmate chu khuarel mawina tichhe lo thei ang bera cheithat tum a nih thu a sawi bawk.
Minister chuan sawi chhunzawmin, “Hmasawnna ruhrel sak engemawzatah, a enkawl leh hman dan turah ruahmanna a awm tha tawk lo a, chuvangin infrastructure tha tak tak pawh enkawltu mumal awm lova țawl chhia a awm thin. Tuna kan project turah hi chuan a sak lai leh enkawl chhunzawm kawngah khawtlang nen tha taka thawhho kan duh a, ziaka inremna mumal tak neih hmasak kan duh a ni” a ti.
Mizorama tourist site cheithatna tur hian SASCI Part-II, 2025-2026 hnuaia ‘Development of Tourist facilities & attractions to Global Scale in the state of Mizoram’ ah cheng vaibelchhe 250 hmuh tawh a ni a. Hemi hnuaiah hian tourist site hrang hranga hmasawnna ruhrel siam bakah tourist lodge pawimawh bik cheithat te, wildlife sanctuary beh chhana wildlife tourism kalpui te, water sports adventure hmun tur siam te, paragliding thlawhna tur siamte a tel.
Sports Minister ni bawk Pu Lalnghinglova Hmar chuan Durtlang North leh Durtlanga sports infrastructure sak mek leh ruahmante a tlawh tel bawk.
