Naktuk-a Lai Autonomous District Council (LADC) hnuaia Village Council (VC) Inthlanpui buatsaih tura inthlan hma nia thlen phakna (P-1) VC 44-a inthlan buaipui tur polling party 57 te leh 12-Lawngtlai Chandmary bial MDC by-election-a inthlan buaipui tur polling party 4 te chuan vawiin khan Lawngtlai DC office kawt aṭangin an duty-na tur hmun an pan.
Polling party kal chhuak turte hian DC office-a Dispatch Counter aṭangin inthlan buatsaihna tur hmanrua leh bungruate lam khawmin, an bungruate an endik fel vek hnuah an duty-na tur hmun panin an chhuak a. Polling party-ah hian inthlan huaihawttu tur Returning Officer (RO)-te, inthlan buaipuitu tur Presiding Officer (PRO) leh Polling Officer (PO)-te, venhimna hna thawk tur security-te leh lirthei khalhtute an tel a ni.
LADC hnuaiah hian VC 99 awmin, 46-Hmawngbuchhuah VC-ah chuan inthlan chuh tura endikna (scrutiny) pal tlang zo an awm loh avangin inthlan buatsaih a ni dawn lo va; 29-Saikhawthlir VC-a seat 5 awmah chuhtu 5 (INC 1 leh ZPM 4) awmin, khingtu dang an awm loh avangin inthlan buatsaih ngai lova tlinga puan an ni dawn bawk a. Heti hian VC 97-ah inthlan buatsaih tur niin, voter tam zualna VC ṭhenkhatah auxiliary polling station dah belh a nih avangin polling party 112 an awm dawn a. Lawngtlai aṭanga hla zual, inthlan hma ni hniha pan ngai (P-1) VC 53-a inthlan buaipui tur polling party 55 chuan nimin khan an duty-na tur hmun an lo pan tawh a ni.
12-Lawngtlai Chandmary bial MDC by-election buatsaih turah polling station pali – Lawngtlai Chandmary North-I, Lawngtlai Chandmary North-II, Lawngtlai Chandmary South-I leh Lawngtlai Chandmary South-II – a awm a. Polling station tinah hian inthlan buaipui turin PRO 1 leh PO 2 ṭheuh an awm dawn a. Vawiin khan polling party-te hian an duty-na tur hmun an pan ve nghal a ni.
LADC VC Inthlanpui leh 12-Lawngtlai Chandmary bial MDC by-election buatsaih turah hian naktuk, June ni 27, 2024 (Ningani) zing dar 7:00 leh tlai dar 5:00 inkarah vote thlak a ni ang a. VC Inthlanpuiah hian ballot paper hmanga vote thlak tur niin, MDC by-election-ah hian Electronic Voting Machine (EVM) hmangin vote thlak tur a ni thung a. VC Inthlanpuia vote tlate hi inthlan zawh rualin polling station hmun ṭheuhvah chhiar nghal a ni ang a; MDC by-election-a vote tlate erawh chu July ni 1, 2024 (Thawhṭanni) chawhma dar 10:00 aṭangin chhiar a ni thung ang.
VC Inthlanpui leh MDC by-election-a polling official duty tur, postal ballot-a vote thlak dilte tana vote thlak theihna ruahmanah June ni 22, 2024 aṭanga vawiin thlengin VC Inthlanpui atan postal ballot vote 288 leh MDC by-election atan postal ballot vote 47 a tla a ni.
