Ministry of Consumer Affairs, Food and Public Distribution a Under Secretary Subrata Sanyal chuan August ni 14 khan Mizoram Food, Civil Supplies and Consumer Affairs secretary hnenah lehkha rawn thawnin cheng vaibelchhe 5 hu buhfai metric tonne 1,379 leh quintal 34 chu raltlan, a bikin cyclone Remal leh khuarel chhiatna dang tawkte’n a thlawna an dawn turin a rawn pe a. Hei hi ni 60 chhunga chinfel vek tur a tih a ni a. A senso hi Ministry of Home Affairs in a rawn tum vek dawn a ni. Home department hotute chuan Food, Civil Supplies and Consumer Affairs department nen tangrualin buhfai lak leh semchhuah hna hi an thawk dawn niin an sawi a, district bawrhsapte’n district chhunga raltlan awmte’n an mamawh an thehluh anga sem a ni dawn a ni.
Tun dinhmunah Mizoramah raltlan 45,000 thelh an awm mek a. Sorkar chhinchhiah dan thar berah chuan Myanmar atanga raltlante hi 33,724 an ni a, an zinga 10,800 chuhmeichhia niin 12,765 chu naupang an ni. Myanmar raltlan Mizorama awm zinga 16,979 -te hi an puala sak relief camp 129-ah awm mekin mi 16,755-te erawh chuan an chhungte leh thiante an belh bakah mahni a in luahte leh mi hnuai a thawkin ramhnuai thlamah chhungkua-in an awm chilh bawk a ni. Myanmar atanga raltlan rawn lutte hi February ni 1, 2021 a sipai-in thuneihna an hnehchhuh hnu atanga rawn lut tan, tualchhung indona avanga rawn luh belh ta zel an ni a, Mizoram district tinah an awm a ni. Champhai district-ah tam berin mi 13,966 an awm a, Siaha district-in dawtin mi 5,953 an awm a, Lawngtlai district-ah mi 5,922 an awm bawk a ni.
Bangladesh Chittagong Hill Tracts atanga raltlan lo lut la awm mekte hi mi 2,014 an ni a. Bangladesh atanga rawn raltlante hi district dangah awm lovin Lawngtlai district-ah chauh an awm a. Anni hi Chittagong Hill Tracts a cheng zofate tana thuneihna sang zawk ngiata ralthuam lektu Kuki-Chin National Army (KNA) leh Bangladesh sipaite inkah fo avanga rawn raltlan an ni.
Mizoram thenawm Manipur a nikum May ni 3 atanga Meitei leh zofate inchemharna avanga Mizorama rawn raltlante hi hriat theih hnuhnung berah mi 8,951 an ni a, district 9-ah an awm a. An zinga mi 1,294 te hi Aizawl, Kolasib leh Saitual district a an puala siam relief camp 23-ah khawsa-in mi 7,657 te erawh chu an chhungkhat laina leh thiante an belh bakah mahni in luaha awmte an ni.
