Mawkyrwat, Nailur : Katto katne ngut ki runar ki bym lah ban tip ki dei kiei, hynnin ka miet Sngi Palei kaba la dei artad ka step Sngi Thohdieng ki la thang ia kawei ka kali Maruti Alto kaba don ia u number ML05M3148 kaba dei ruh ka kali jong u Bah Ferdinance Syiemiong, u Acting Syiem ka Hima Nobosohphoh katba ka u dang pynieng harud surok ha ka shnong Mawsyntiew hajan Rangblang Pombriew, kaba jngai kumba 25 KMs eiei na Mawkyrwat, South West Khasi Hills District.
Ki paitbah katei ka thain ki pyntip ba katei ka jingjia ka la jia ha ka por kumba 2 baje duna eiei mynstep, hynrei ym don ba tip katno ngut ki runar ki donkti ha kane ka kam leh dusmon bad ym don ba tip hi ruh da ei ki pyndonkam ban thang ia katei ka kali.
Haba kren ha ki lad pathai khubor, u Bah Ferdinance u la pyntip ba kane ka dei ka sien kaba ar ba ka kali jong u ka shah leh dusmon ha ki runar kiba ym lah ban tip.
U la ong ba ha ka jingjia kaba nyngkong eh kaba la jia ha u bnai ba la dep, ki runar ki la pynpait ia ki iit jong ka kali bad khynniat ruh ia ka kali shapoh khlaw kaba la wanrah ia ka jingjulor kaba malu mala, hynrei ha kane ka kynti ba mynta pat de ki la thang syndon ia katei ka kali kaba la jan kylla dpei.
U Acting Syiem u la pynpaw ka jingsngewsih halor kane ka jingjia bad u la kyntu ruh ïa kito kiba leh ïa kane ka kam runar ba lada ki don kano kano ka daw ne ka jingeh kidei ban wan shakhmat ban ïakren bad u markhmat, bad ban kiar na kaba pynjulor ïa ki mar ki mata jong u.
Ki tyllong khubor ki iathuh ba mynta ka janmiet u Acting Syiem u la ujor da ka FIR hapoh Thanat Mawkyrwat pyrshah ia ki runar ki bym lah ban tip bad kyrpad ruh ia ki pulit ba kin thwet bad kem ia kiba donkti. Ki tyllong khubor ki la pyntip ruh ba ha ka FIR u Acting Syiem u la pynpaw ba um don kano kano ka jingiakajia badno badno bad kumta um don jingsuba iano iano ha kane ka jingjia.
U Superintendent of Police ka South West Khasi Hills, u Bah B. Jyrwa u la iathuh ba na ka liang jong ki pulit ki la sdang ia ka jingtohkit halor katei ka jingjia, hynrei haduh mynta kim pat lah ban kem iano iano ruh. Haba kylli la ki riew sniew ki pyndonkam da ka petrol bomb ban thang ia katei ka kali, u SP u la ong ba haduh mynta kim pat lah ban pynthikna.
