Shillong, Nailur : Ka seng FKJGP-Khliehriat Circle hapoh ka jingialam u Secretary Bah Justme Sana ryngkat ka MPUF-EJ hapoh ka jingialam u President Bah Kyrshan Blah ki la leit ban iakynduh ia u Superintendent ka East Jaintia Hills ha office treikam jong u ban pyn kynmaw biang halor ka Dorkhas ba ka seng ka la buh ha ka 21/05/2025 halor ka kam khaii tuh masi bas shini sha Bangladesh.
Na ka liang kitei ki ar seng ki sngew phylla ban tip ba wat hadien ba la dep ujor sha u SP ruh kitei ki kam beaiñ shalan masi tuh khlem ki kot ki sla ki dang iai bteng haduh mynta, kaba sngew phylla ba kitei ki kam beaiñ ki iaid lyngba ki Check point jong ki pulit Ladrymbai hynrei ym don ba tehlakam bad kane ka pynsuba ba ka lah ban don eiei sha lyndet da ka jingiasngewthuh jingmut.
Ka jingshalan tuh ia ki Masi sha Bangladesh lyngba ka thain Ladrymbai shaduh Bangladesh ym tang ba kitei ki nong supply ki pynrung tuh ia ki Masi Shapoh Bangladesh hynrei ki dei ruh ki Nongialam lynti ia ki Nong Bangladesh kumno ban ioh rung tuh ha Ri India bad ka jingbym shim khia da ki bor ba dei peit ka lah ban buh jingma ia ka jylla khamtam ha East Jaintia bad la iohi ba ki jait Muslim ki kynrei bha ha ki Thain Ladrymbai, Khliehriat bad kiwei ki jaka hapoh East Jaintia.
