Vawiin chawhnu khan Mizoram Police Sports & Cultural Control Board bultumin ‘Mizoram Police Football Club Golden Jubilee Celebration Programme’ hman a ni a. Pu Lalnghinglova Hmar, Minister of State, Sports & Youth Services Department, President MFA ni bawk chu khuallian niin Pu Anil Shukla, IPS, DGP(M) chuan kalkhawmte lawmna thu a sawi a. Mizoram Police Football Club-a player lo ni tawh te chawimawina hun leh boralte sunna hun hman niin Exhibition Match neih a ni bawk. Khuallian Pu Lalnghinglova Hmar, Minister of State, Sports & Youth Services Department chuan Mizoram Police Football Club chu Mizorama Football tihmasawntu hmanraw pawimawh tak a nih thu leh ram pawn thleng a Football hmang a inelna hrang hranga Mizoram hming timawi thintu a nih thu sawiin Golden Jubilee thleng thei a an inkaihhruaina leh enkawlna chu fakawm a tih thu leh a lawmpui thu a sawi a.
Ram chhung leh pawn a an fehchhuahnaah Mizoram Police hming a chakna nomawi thahnem tak an lo hlawhchhuah tawhnate chu ropui a tih thu a sawi. Sports Minister chuan infiamna chi hrang hrangah, mizo thlalaite thiamna leh theihna hai chhuak tur chuan mi nawlpui ban phak, Sports Infrastructure tha siam a pawimawh thu a tarlang a. Heng infiamna hmang a hlawhtlinna tluantling nei tur chuan kan lawm zawng leh nuam tih zawng Sports discipline chauh thlang lovin kan hmasawnpui theih tur kan thlan thiam a pawimawh thu a sawi.
Pu Lalnghinglova Hmar chuan Mizoram sawrkar flagship program, Bana Kaih Scheme kaltlangin nasa tak a Sports tihmasawn tum a nih thu sawiin Sports discipline hrang hranga thalaite theihna haichhuahna tur ‘Talent Identification’ leh an theihna tuaihriamna tur ‘Coaching’-te kalpui tum a nih thu a sawi a. India’s Olympic Vision 2036 tinzawn chung a mizo infiammite tan ruahmanna kalpui thiam a pawimawh thu Sports Minister chuan a sawi bawk a ni. Mizoram Police Football Club Golden Jubilee lawmnaah hian Pu Stephen Lalrinawma, MPS chuan MPFC chanchin tarlanna hun neiin MPFC player lo ni tawh te atangin thusawi ngaihthlak a ni a. Pu Lalbiakthanga Khiangte, IPS, IGP (Hqrs) & Chairman, MPSCCB chuan lawmthu sawina hun a hmang a ni.
