Vawiin chawhnu khan Sports Minister Pu Lalnghinglova Hmar chuan Cultural Centre cum Auditorium, Vaivakawn ah Aizawl West -II Assembly Constituency bial chhung a Sawrkar school a zirtirtute nen inkawm hona hun a hmanpui a. He hun hi Pu H.Lalramenga, PS to Minister-in kaihruaiin Aizawl West -II bial chhung a zirtirtute he hun ah hian telin, University exam 2023-24 a topper-te hnen ah lawmpuina thil pek hlanna hun hman a ni.
Sports & Youth Services Department Minister Pu Lalnghinglova Hmar, Aizawl West II bialtu MLA ni bawk chuan zirtirtu hna chu hna zahawm leh pawimawh tak a nih thu sawiin zirlaite nun kawng dik kawhhmuh kawng ah hunbi vawn dik ngaih pawimawh hmasak a tul thu a sawi a. Zirlaite harsatna hriatpui turin leh an mamawh ang a kaihruai tur chuan zirtirtute leh zirlaite chuan hun an hman ho tam a pawimawh thu a sawi a. Zirna in te chu khawtlang, nu leh pa leh zirlaite tan pawh a luh chakawm tur a buatsaih a pawimawh thu Minister chuan sawiin zirna tih hmasawn nan kalkhawmte chu thawhhopui ah a sawm a ni.
Minister Pu Lalnghinglova Hmar chuan Aizawl West II bial chhung a University Exam 2023-24 a titha zual, chawimawina dawngte chu a lawmpui thu sawiin khua leh tui tan a mi tangkai leh hmasawnna thlentu chherchhuah kawng ah zirtirtute chu thahnemngai tak a thawk zel turin a fuih bawk a ni.
Pu Lalsangliana, Director, School Education Department chuan thiamna leh hriatna rintlak hmang a naupangin hmabak eng zawk an neih theih nana thawktu pawimawh tak, zirtirtute chu zirna piah lam ah zirlaite tan a entawntlak nun nei turin a chah a. School leh a vel chu zuk leh hmuam fihlimna hmun a siam a nih theih nan tan la theuh turin kalkhawmte a chah. Zirlai nu leh pate leh khawtlang mipuiin zirtirtute lakah beiseina hrang hrang an neih thin thu School Education Department Director chuan sawiin heng beiseina tihlawhtling tur hian zirna kan kalpui dan ah nitin intuaihriam zel turin kalkhawmte a fuih bawk a ni. Pu Lalsangliana chuan Mizoram hmun hrang hrang a zirna tihmasawn tur chuan zirlaite mamawh dan a zirin thiamna leh tawnhriat hrang hrang nei, zirtirtute chu hman tangkai zel an nih theih nan an awm kual thin a pawimawh thu a sawi a, rinawmna leh rawngbawlna thinlungpu chung a hna thawk zel turin a chah bawk a ni.
Vawiin inkawmhona hun ah hian School hrang hrang atang a zirtirtute chuan an school dinhmun leh harsatna an neih theuhte sawi zauna hun an nei a. Hmalakna kalpui dan tur te sawi ho a ni bawk a ni.
