Vawiin khan Pu Lalnghinglova Hmar, Minister of State, Sports & Youth Services Department chuan Sports & Youth Services Directorate-a Coach Refresher Course kalpui mek a hmanpui a, Olympic 2036 a Mizo infiammi an tel ve theih na’n coach te’n mawhphurhna sang tak an nei tih a sawi. Sports Minister Pu Lalnghinglova Hmar chuan coach te chu tih tak takna nen thawk a, Mizo infiammi te hmasawnna tura theihtawp chhuah turin a chah a. Coach te chu mahni hna dah pawimawh hmasa ber tur leh, hun vawn dik leh inthunun chungchangah an zirlaite entawntlaka nung turin a fuih a, coach berin training a kal tlai chuan hmasawn a harsa tiin training pek dawnah a hun hmaa thleng țhin turin a chah.
Sports leh infiammite hmasawnna tura Sorkarin hmachhawp a neihah thawhpui turin a sawm a, Sorkarin Bana Kaih policy hnuaiah sports coaching lian tham zawka kalpui a tum mek thu a sawi. Sports & Youth Services Department chuan October ni 15 atangin coach te tan intuaitharna (refresher) course a buatsaih a. October ni 15-16 chhung khan Seminar on Sports Medicine and First Aid neih niin, nimin leh vawiinah Seminar on Sports Psychology and Method of Training neih a ni thung.
He hunah hian Department Coach te bakah Khelo India State Centre of Excellence (KISCE), District Khelo India Centre(KIC) Coach te leh Scouts & Guides, Adventure Wing Staff mi 55 chuang an training a ni.
