Tukin khan Pu Lalnghinglova Hmar chuan sawi lawk loin MZP Pisapui, Treasury Square a tlawh a. MZP General Headquarters hruaitute nen an inkawm. Minister chuan, Youth Minister a nih angin MZP Pisapui a tlawh tih sawiin, MZP chu Zirlaite leh Mizo hnam tana pawl pawimawh leh tangkai tak a nih avangin an office hmuhpui a duh vanga tlawh a nih thu a sawi bawk.
Minister chuan, Mizo ṭhalaite leh Zirlaite zingah ruihhlo (damdawi) ngawlvei leh ti thar an awm zel leh an pung chho zel chu a mangan thu a sawi a. Theih ang anga hmala turin MZP a sawm a ni. Minister chuan a hmachhawp leh hmathlir hrang hrang a sawi bawk.MZP pawhin, Youth Minister a nih avangin an in tih neitu thu hrilhin, duhsakna an hlan nghal a. MZP Pisapui a tlawh avângin lâwmthu an hrilh.
Mizo zirlaite leh ram leh hnam tana a department chan hnuaiah thawhpui an inhuam tih MZP chuan Minister an hrilh a. MZP chuan Sports Department hnuaia Sports Infrastructure-te zirlaite tana hman tangkai theih tura ruahmanna siam turin an ngen nghal a, a department hnuaia hnathawh hang hrangte theih ang angin an enpui dawn tih an hrilh bawk. Hun remchang hmasa berah thawhho zel dan tur sawiho nise an ti bawk.
