Sports Minister Pu Lalnghinglova Hmar chuan infiamna chu inunauna leh inpumkhatna atan hmanraw tangkai tak a ni tih a sawi. He thu hi vawiina Khelo India University Games mipa football inelna a hawnna ah sawiin Minister chuan tunlaiah infiamna tam tak hlawhtlin pui tlak a awm a ti a, inpumkhatna leh inunauna tha siamna hmanraw tha tak a ni tih sawiin hei mai bakah eizawnna tha tak a ni a ti a, thalai zingah football atanga sum tam tak pet chhuak an awm tih a sawi bawk. Mizoramin a thlen bik mipa football hi Aizawl Mualpuia Rajiv Gandhi Stadium-ah khelh a ni a, khuallian Pu Lalnghinglova Hmar chuan University pariat atanga mipa football khel tura lo kalte chu duhsakna a hlan a, Mizoram boruak nuam leh thianghlim takah nuamti taka infiam turin a chah. Mipa Football-ah hian team pariat – Mahatma Gandhi University; University of Calicut; University of Kerala; Punjabi University; Guru Nanak Dev University; Adamas University Kolkata; University of Calcutta leh Shivaji University Maharastra te an inlan a, group pahnihah then hran niin an inkhelh kual vek hnuah a sang pali ten semifinal an khel ang.
February 27 hian a hmawr bawk tur a ni. Khelo India University Games 2023 hi hmar chhak state ten an inthlen tawm a, a thlengtu pui ber Assam chuan infiamna peng 16 an thleng a, state dangte chuan infiamna peng pakhat theuh an thleng. Manipur erawh an state a buai avangin inelna an thleng ve thei lo a ni. Akashvani zawhna chhangin Sports and Youth Services Director Pu Lalnunhlua chuan, a tira ruahnan dan chuan Khelo India University Games hi February 18 atanga khelh tur kha a ni a, mahse Pathianni a nih avangin Mizoramah chuan vawiin atangin an khel tih a sawi a.
Hun chep tak karah Mizoram sorkar chuan Khelo India thleng tur hian theihtawp a chhuah a, hmunhmate duhthusam chiah lo lai deuh te awm mah se, a theih anga thain an dawngsawng tih a sawi bawk. Mipa football bikah hian infiammi 175, team enkawltu mi 25 leh midang tawiawmtu mi 70 bawr vel an lo kal a, vawiin thleng khan mikhual thlen belh an la awm avangin mikhual zat tak hi sawi chian theih a la ni lo.
