Vawiin khan, Sports &Youth Affairs changtu leh Mizoram State Sports COuncil (MSSC) chairman ni bawk Pu Lalnghinglova Hmar chuan a Office Chamber, Minico-ah tunhnaia India ram pum huap leh khawvel pum huapa Mizoram aiawha infiammi titha zualte hnenah lawmpuina thilpek a hlan.
He hunah hian Sports Minister Pu Lalnghinglova Hmar chuan lawmpuina leh fuihna thute sawiin, Mizoram sawrkar chuan rilrua kum 2036 Olympic nei reng chungin Mizorama infiamna leh Infiammite chu a vil zui zel dawn tih a sawi a. Mizote chu infiamna lamah chuan hmasawn hlein inhre tawh mah ila, hnam anga kan tih theih zualna lai zawn thiam leh tih tak zetna kan neih a pawimawh tih sawiin, Sports Policy thar pawh sawrkar chuan duangin Cabinet pawhin a pawm tawh thu a sawi a. Infiammite chu tun aia medal tam zawk Mizoram tana hawn theih tura inbuatsaih tur a fuihin, Department pawhin theihtawp chhuaha thingtlang lam thlenga Infiammite zawn chhuah kawnga tan a lak tur thu a sawi bawk a ni.
Vawiina lawmpuina hun hi Pu Henry C. Lalrawnkima, Secretary, MSSC chuan a kaihruai a. Infiammite nen inkawmhona hun hlimawm tak hman nghal a ni bawk a. Lawmpuina thilpek dawngte hi kumin National Sports Day, 29-August-2025-ah lawmpuina pawisa fai hlan leh an ni ang.
