Tukin khan Sports Minister Pu Lalnghinglova Hmar, Aizawl West-II bialtu MLA ni bawk chuan a bial chhunga Dawrpui Vengthar Local Council, NGO leh political party hrang hrang aiawhte nen Dawrpui Vengthar YMA Hall-ah khawtlang mamawh hrang hrang leh hmalak dan turte an sawiho.
Tukin an inkawmhonaah hian Dawrpui Vengthar khawtlang hruaitute chuan an veng chhung hmasawnna tura rawtna an neih te leh hmalakna kal mek te bialtu MLA hnenah an thlen a. A theihna zawnah theihtawp chhuaha a lo bawhzui tur thu MLA chuan a sawi a ni. Hmalakna tur sawiho zingah zirna lama hmasawn te, Mizoram Building and Other Construction Workers Welfare Board (MBOCWWB) hnuaia kuthnathawktute tana hamthatna awm thei leh mipui nawlpui hriata puanzar dan tur te, awmze nei leh huapzau zawka ruihhlo do chungchang te a tel a ni.
Tunkar chhungin Minister hian Aizawl West-II bial chhunga veng hrang hrangte a tlawh a, karleh lamah tlawh chhuah hman beisei a ni.
