Vawiin chawhnu khan Pu Lalbiakzama, Mizoram Speaker chuan Falkland Hall, Aizawlah 3GEN Global Healthcare Multi-Speciality Hospital SAKNA tur lungphum a phum.He hunah hian Speaker chuan kal khawmte hmaah thu sawiin, hriselna, zirna leh mipui vantlang himnate chu ram hmasawnna lungthu pathum, a kim lova ram hmasawnna kal dik thei lo an nih thu sawiin, Mizoram chu hriselna bikah a la hnufum avanga ram hmasawnna pawh khingbai nia a hriat thu a sawi a. Hemi phuhru tur a 3Gen Global Healthcare an rawn che chu hmasawnna rahbi thar chhinchhiah tlak a nih thu a sawi a. 3gen Global Healthcare-in thil thar a rawn ken tel tur Air Lift Ambulance Service te, Eye Transplant leh Robotic Surgeries te chu Mizoramah a hmasa ber tur an nih bakah, Air Ambulance facility phei chu, India hmarchhak ah pawh a hmasa ber tur a nih dante sawiin, 3Gen Global Healthcare Multi-speciality Hospital lo ding tur chuan damlo enkawlna bakah Mizoramsum leh pai lamah nasa tak a thantirin, thalai tam tak tan eizawnna a pek tur thu a sawi a.
Phai lam, inenkawlna atan a mimal sum tam tak luangral ṭhinte pawh Mizoramin a hum theih phah dawn tih sawiin, 3Gen Global Healthcare Multi Speciality Hospital a din hunah chuan mizote tan malsawmna nasa tak thlentu a nih ngei a beisei thu a sawi bawk a ni. Hun hman hi Pi VT Maduhi chuan kaihruaiin, Rev Timothy T Nunthanga’n kalkhawmte lawmna thu a sawi a. Rev Zionvarmawia’n hun serh hmangin, Dr Lorrain Lalpekliana Chinzah, MLA, Adviser to CM (Health-in-charge) leh Pu Lallianzuala Hmar, Member, MSPCC-ten thu an sawi a. Pi V Sianghnuaithang, Administrator, 3Gen Global Healthcare Multi-speciality Hospital chuan lawmthu sawiin hun hi a khar a ni.
3Gen Global Healthcare Multi-speciality Hospital Building SAKNA tur hian sum ruahmanlawk zat (estimated amount) chu cheng Vaibelchhe 5 (Rs. 5 Crore) vel niin, A nih tur anga peih vek tur hian cheng Vaibelchhe 25 (Rs. 25 Crore) vel ruahman a ni.
