Nimin khan Mizoram Youth Commission Conference Room-ah MYC kaltlang a Spa therapy training tur mi 7 (pasarih) thlah liamna hun hman a ni. Heng thlanchhuah mi 7(Pasarih) te hian naktuk ni 25, September, 2024 (Nilaini) hian Aizawl chhuahsanin Delhi an pan anga, Chumi hnuah Goa lam panin thla 18 chhung an training ang. He inthlahna hunah hian Pu Malsawmzuala Ralte, Mizoram Youth Commission Chairman chuan thusawiin spa therapy training turte leh an chhungte lo kal zawng zawng, MYC hmingin chibai a buk a, Chairman chuan “Mi 100 chuang atangin nangni nula fel tak tak 7 hi thlan chhuah in ni a, a nep lo. In hawiher, chetzia leh tawngkam atanga teh a, training tura thlan in ni. Naktuk maiah vai ram panin in kal tawh dawn a, a then chu la kal ngai lote pawh in ni ang. In kal chhuah chhan hi hre reng a, hlawhtling taka training chhuak vek turin kan duh che u a ni” ati.
MYC Chairman Pu Malsawmzuala Ralte chuan, ‘Tawrhchhelna, tumruhna leh tih hram hram a ngaih hun pawh a awm ngei ang” ati a. Zalenna hmang sual lo tur leh Kristian kan nihna vawng nung reng turin a ni tiin thu a chah bawk a ni. Kan awmna hmun a zira a tha zawng a kan insiam rem thiam a tul hle a, Mizo te hian insiam rem zung zung hi kan harsat deuh thin a, hemi kawngah hian inzir kan ngai hle a ni a ti bawk. He hunah hian MYC leh Spa Therapy Trainees hote chuan intiamkamna ziahna hun an hmang nghal bawk a. MYC leh Trainees te tih tur leh intiamkamna point hrang hrangte uluk taka chhiar a ,sawiho anih hnuah intiamkamna hi ziah a ni. He hunah hian Trainees te bakah an chhungte’n an telpui thei bawk a ni.
He training programme kalpui theih nan hian Mizoram Youth Commission leh Bharat Hotels Limited, New Delhi te chuan thawhhona thuthlung (MOU) an ziak a. MYC aiawhin Pu Malsawmzuala Ralte, Chairman MYC in a sign a ni.
