South Tuipui bialtu MLA Pu Jeje Lalpekhlua Private Resolution – ni 100 chhunga tih hlawhtlin tur Sawrkarin a lo duan lawk tih hlawhtlin ani chho zel hi lawmawm ka ti tih chu vawiin khan House in a pass.
Pu Jeje Lalpekhlua chuan ni 100 chhunga tih tur Chief Minister in point 12 a puang chu lawmawm atih thu a sawi a, hemi a hlawhtlin ngei theih nan State sawrkara General Monitoring committee on Chief Minister 100 days program chu din a ni a, hei hian Chief Minister in ni 100 chhunga a tihtur hi a tih mai mai loh zia a lang thei ani a ti a, chona sang tak insiam ngam sawrkar an nei chu a thlamuan thlak hle a ti.
Opposition Leader Pu Lalchhandama Ralte chuan Sawrkar chuan mipuiten an fak hun nghak zawk tura a ngaih laia ni 100 pawh a tlin hmaa mahni infak chu an tan pawmpui chi a ni lo a ti a, ni 100 chhunga tih tura an puan zinga mi MSSSB thiah chu an duhloh avangin Private Resolution an pu lut tawh a, zirlai mangang mek te aw hriat lai leh kuthnathawktu hmunphiah ching te mangan mek laia lawmthu sawi chu an thiam ve dawnlo tih sawiin kuthnathawktu mangang te leh zirlai mangang te lamah an tang tlat a ti.
Pu Lalchhandama chuan Thlai thar 4 lei tur chu sawrkar kum tharah ni lovin tun financial year ah ani tih Larsap in chiang takin a sawi a ti a, Kuthnathawktute an mangang mek a, RR Associate mawhpuh ngawt lovin mipuite harsatna tawh mekah mawhphurhna an lak ngam ngei a beisei tih a sawi.
Opposition Leader chuan Anti Corruption Bureau ko tura thutlukna erawh a lawmawm tih sawiin, sorkar hnathawk te hun vawn chungchangah pawh hmalakna a awm chu a lawm thu a sawi a, Sawrkar hnathawkte lakah mawhphurhna dah vek lohin mahni in hma hruai tur a ni tih a sawi bawk.
Pu Lalchhandama Ralte chuan Sawrkar inrenchem kum chu a thu chuan a tha hle a ti a, MNF Ministry pawhin Congress kum 10 hnuah Car thar an lei tih sawiin tunah MNF chu kum 5 chauh a sawrkar a, car thar lei hun ala nilo tiin tun dinhmunah ZPM MLA te chuan car 1 chauh an kawl lo a, a hrechiangtu te chu mipuite an ni a, sawrkar thara Board hrang hrang an din danah sawi tur tam tak a awm a ti a, MLA rual an awm teuh laia mihrang pawisa sen belhna tur leh midang duhsakte pek belhna tur chuan inren lam a kawk lo niin a sawi bawk.
