Vawiin khan Social Welfare, Tribal Affairs, Women & Child Development Minister chuan ‘Diet Diversity and Nutritional Outcomes Among Children and Women : A Study of Mamit District’ tih lehkhabu chu SAD Conference Hall, MINECO-ah a tlangzarh. Lehkhabu tlangzarhna inkhawm SWTA&WCD Joint Secretary Pi Zonunthari kaihhruaiah Minister Pi Lalrinpuii chuan thusawiin hmeichhia leh naupangten ei tur ṭha leh kham khawp an hmuh phak ngei hi a pawimawh a, sorkar pawhin chu chu hriain State, District, Block leh Sector level-ah te inzirtirna nasa takin a kalpui mek zel a ni a ti a.
Hemi kawngah hian sorkar chauh ni lovin, tlawmngai pawl hrang hrang, khawtlang leh mimal ang pawhin hmalak leh ṭanlak a ṭul takzet a ni a ti. Women & Child Development Department chuan Nutritional Health Education, Home visit, CBE, PohanMahh leh PoshanPakhwada kaltlangin theihtawp a chhuah zel chung pawhin hmeichhia leh naupang zingah thisen tlachham (anemia) leh ṭhanṭhu (stunted) te a la hluar hle chu pawi a tih thu leh ei tur ṭha leh an mamawh ang damdawi ṭhate an dawn theih nan department hnathawkte pawhin theihtawp chhuah zel turin a fuih. Nunphung dik leh ei tur ṭha hmuh chuan state mipuite tan hlimna leh hriselna ṭha pawh a siam thei a ni a ti. Women & Child Development Department Director, Pi Zoramthangi Chhangte pawhin thusawiin Integrated Child Development Services (ICDS) chu rampumah Anganwadi nuai 14 a huamin khawvelah hmeichhia leh naupangte hmathatna tur programme lian ber a ni a; tun dinhmunah Mizoramah pawh ICDS Project 27 kalpui mek niin heng hnuaiah hian Anganwadi 2244 enkawl mek a ni tih a sawi a.
Poshan Tracker-ah a landanin Mizorama ICDS Project kalpui mek hnuaiah beneficiary 1,17,782 an awm a; chung zingah chuan Naupang kum 6 hnuailam 108,255, Nu naupai 5,912, Nu nau hnute pe lai 3,610 leh hmeichhe tleirawl (kum 14-18 inkar) 19,240 te pawh an awm tih a tarlang. ICDS hi Mizoramah kum 46 chhung kalpui tawh a ni a (1978 atangin) leh Poshan Abhiyan pawh kum 5 chhung kalpui tawh ni mahse National Family Health Survey 5-in a tarlan danin Naupang kum 5 hnuailam zaa 26% chu ṭhanṭhu (stunted) an ni a, 14% chu rihna hniam (underweight) leh Hmeichhia kum 15-49 zingah 4% chu rihna hniam (underweight) leh 45% chu thisen tlachham (anemic) an ni tih a sawi. Mamit District chu Aspirational District a nih vang leh Mizo, Bru leh Chakma hnamte an awm vangin Diet Diversity and Nutritional Outcomes Among Children and Women zirchhianna (Study) pawh he district chhungah beihpui thlak a ni tih a tarlang bawk.
